كتعمر 6 آلاف لتر ديال الما في 12 ثانية وتنزل في أي ضاية فايتة مترو و40 سنتيم.. ها طيارة كنداير سي-إل 415 للي بغى المغرب يعاون بيها الجزائر

نجمة هاد السيمانة في المغرب هي طائرة كنداير سي-إل 415 لي تم الاعتماد عليها في عملية السيطرة على العافية لي شعلات في زاكورة.
المغرب هو البلد الأفريقي الوحيد لي عندو هاد النوع من الطيارات لي كتصنعها شركة " بومبارديي" الكندية لي كان عندها مصنع في المملكة، تحديدا نواحي كازا قبل ما تبيعو وتخرج في 2019.
المعلومات التقنية على هاد الطيارة كتفيد أن خاصها ما بين 9 و12 ثانية باش تعمر 2 ريزيرفوارات ديال الما، كل واحد يقدر يهز 3000 لتر.
ويمكن ليها في نفس الوقت خلال الطيران أنها تخلط مواد كتساهم في إطفاء العافية مع الما، والنتيجة تكون فعالة.
هاد الطيارة ممكن تهز الما ملي تكون طايرة من الواد ولا البحر والبحيرة بعدما كتحل واحد الكابو كين التحت وطير للوجهة ديالها تقضي الغرض.
وبفضل قدراتها الكبيرة تقدر تهبط حتى ل15 متر وتلوح الما لي هازة في مساحة 400 متر في قل من 12 ثانية.
أكثر من هادشي، هاد الطيارة ممكن ليها تنزل في أي ضاية كبيرة خاص غير العمق ديالها مايكونش قل من مترو و40 سنتيم.
البيلوط ديال هاد الطيارة خاص يكون على مستوى كبير بزاف من الاحترافية حيت ماشي ساهل تمانوفري طيارة كتحرك وفي نفس الوقت كتهز في الما.