زيدو الضريبة على الطحين والسكر والزيت والمونادا والعصائر لي كيضرو الناس ويسببو ليهم الأمراض وخليو عليكم الشراب راه السكايرية تقهرو بالغلا واش بغيتو ولاد الشعب يشمو السيليسيون عوض يشربو الروج

الإحتجاجات في المغرب والمسيرات متنوعة وديما حاضرة وكل واحد علاش كيحتج، الأطباء نزلو حتجوا الممرضين كذلك الأساتذة المعلمين بالكونطرا، صحاب حجابي عفتي لي متضامنين مع فلسطين صحاب سايتي حريتي، لي ضد الغلاء لي ضد أسلمة المجتمع، ولاد زروال مالين الداكا، الحقوقيين، لي خارجين ضد شي فيلم، وحاليا لي ضد التلقيح ولي ضد جواز التلقيح ولي ضد الغلاء ولي باغي الكرامة والحرية، لي تضر من شي حاجة راه كيخرج يعبر عليها، إلا السكايرية مساكن بحال الى فيهم الجذام، ماخاصهمش يتخلطو مع الناس في الشارع ويعبرو على الحاجة لي كتضرهم، عام على العام كيتزاد في ثمن الشراب، بالإظافة الى الظروف اللاإنسانية ديال التقدية ديالو، معزول بوحدو في الأسواق الكبرى، ملي تدخل تبغي تسارى شوية وتشوف الثمن ديال كل حاجة كتلقى السيكوريتي بدا تابعك حاضي معاك لتسرق شي حاجة ، حيت السكايري المغربي مكيتساراش كيدخل قاصد شنو باغي وعارف شحال الثمن والعدد وكاين لي جايب الفلوس معاه حساب، كيدخل ديريكت كيهز داكشي لي بغا كيخلص ويزيد، وغير يخرج مع الباب خاصو يختافي في طوموبيل ولا موطور ويتبخر من تم.
بغيتي غير تسخر معاك لشي واحد وباغي يعرف شنو عندهم ونتا باغي تصور وتسيفط ليه، أول حاجة كتلقاها معلقة مع الدخلة هي ممنوع التصوير بحال الى غادي تصور أسرار عسكرية، ماتدورش ماتصورش تقدى ديريكت وخرج كتجري، وحتى التيكيت ديالك ماكتاخدوش، كتفوت غير الباب ينكروك ومعندك حتى دليل أتك تقديتي من عندهم، الحشيش وماكيتباعش بهاد قلة المعرفة، بغيتي تشرب برا خاصك تنصل السروال الثمن زايد بزاف بالنسبة للقدرة الشرائية ديال المغاربة وولاد الشعب بالخصوص، إييه حتى ولاد الشعب كيضربو الطاسة مكيعيشوش غير بالخبز وأتاي والمرقة ديال بطاطا، ومن غير الثمن زايد الشراب شوف واش هو هاداك أصلا لي طلبتي ولا مدرح ، وكولشي باغي ينتف من السكايرية حيت كيحنانو كتولي تشرب وحاضي راسك، والى بغيتي بلاصة نقية لي تشرب هاني من هاد المشاكل خاصك تحط النص في صاليرك.
ومع ذلك عمرهم تشكاو أو دارو وقفة أو مظاهرة أو مشاو في مسيرة، أو قالوا شي نهار اللهم إن هذا منكر راه ثمن الشراب أصبح لا يحتمل ، واش بغيتو ولاد الشعب يشمو السيليسيون، حتى الإعلام عمرو هدر عليهم أو دار شي برنامج حواري في القنوات الرسمية يهدرو على غلاء ثمن الشراب وتأثيره على القدرة الشرائية للمواطن، كأن لي كيشري الشراب ماشي مواطن، الهدرة غير على الخبز وأتاي والسكر والزيت وطحين الفورص غير الحاجات المضرة بالصحة ولي مافيها حتى فايدة هي لي كتلقى الناس كيدافعو عليها وباغينها ترخاص حيت هي استهلاكهم اليومي، بينما الشراب مسكين واخا قال عليه سيدي ربي في القرآن في منافع للناس ومع ذلك كولشي ناكرو، وبزاف من لي كيستهلكو كيقول الله يعفو علينا من هاد الحرام، إلا المغاربة الأحرار لي متأثروش بثقافة التحريم الشرقأوسطية، هادو هوما لي جايا فيهم مساكن بمختلف طبقاتهم الاجتماعية، في كل عام ومع أي حكومة غير يبغيو شوية دالفلوس أول حاجة يديرو هي يزيدو الضريبة على الشراب كأن المواطن المغربي ناقص ما يثقل جيبه، زيدو الضريبة على الطحين لي كيضر الناس وينفخهم ويسبب ليهم الأمراض، وزيدوها على السكر والزيت هاد السموم القاتلة لي المغاربة كيضلو يخشييو في وجههم منها، وخليو عليكم الطاسة راه تقهرنا.