الشعب لي شفر الحوالا باش يدوز العيد لكبير هو نيت لي مخاطف على رموك ديال البيرة مقلوب هو نيت لي مصوت على العدالة والتنمية.. وهو نيت لي ضد التطبيع ولكن الى جاتو خدمة في إسرائيل يمشي

رموك ديال البيرة تقلب في الرباط العاصمة في حي اليوسوفية، هبط الدرب كامل مكاين غير هز فالبيرة وزيد عيالات ورجال كبار وصغار، كاين لي تما كاع مكيشرب ولكن حيت فابور حتى هو يدير معاهم يد الله، المغريبي كيعتابر راسو ماشي كامبو باش يضيع فرصة بحال هادي، طبعا الشيفور ماتسوق ليه تاحد يموت ولا يتهرس ولا ينوض، المهم هو هاد الرزق لي مشتت ولي جابو الله قبل مع البوناني ودابا بقات خاصة غير حلوة لاكريم ديال ربعمية والسطافيط وها ليلة البوناني طالعة زاهية، هادشي طبعا في دولة النص ديال السكايرية ديالها كيشربو وطايح عليهم الضيم وكيدعيو مع بعضياتهم بالله يعفو عليهم ويعمرهم قلبهم بالإيمان ويقطعو هاد الحرام، ومآمنين بصح أنه حرام واخا تلقاه من نهار عقل وهو يشرب فيه، بالاظافة إلى أن الدولة براسها ولحد الآن باقي الشراب عندها مخالف للقانون.
الشعب لي شفر الحوالا باش يدوز العيد لكبير هو نيت لي مخاطف على رموك ديال البيرة مقلوب هو نيت لي مصوت على العدالة والتنمية، وهو نيت لي ضد التطبيع ولكن الى جاتو خدمة في إسرائيل يمشي، وللأسف في المغرب أي رموك تقلب هاز شي سلعة كيف ماكانت واخا تكون ساوية ريال غادي يتجمعو عليهم ويبداو يشفرو عين بين جماعة عيالات ورال وبراهش، كيتقلب كاميو فلوطوروط كيبانليك بنادم نازل من طوموبيل مخيرة وهاز باكية ديال الموناضا وراجع بيها للطوموبيل علانية ماحشمان ماوالو، كيف ماكيدوز في الضو لحمر الى لقا الغفلة وكيف مكيفوت نوبتو في الصف ويلوح الزبل في الزنقة، ويدخل لشي حانوت أو مطعم ويبغي يتسربى هو اللول، هادشي عام إلا واحد الأقلية راه ربات راسها وتمردات على أخلاق المغاربة الحقيقية.
الشراب في المغرب غالي بزاف ثمنو مضوبل تلاتة ديال المرات مقارنة غير بسبتة ومليلية، وهادشي كيهلك المواطن وفي نفس الوقت مايقدر يهدر مايقدر يحتج، حتى فين كيتباع دايرين ليه بابو بوحدها وكتدخل تسلت وتخرج تسلت ونتا حاضي بحال الى مطيح روح، الجو العم ديال عملية شراء الطاسة في المغرب خالية من الفرح والسعادة وحب الحياة والرغبة بالإحتفال بيها، كاين غير الشعور بالمطاردة والمراقبة والحضية ونتا هاز ميكة فيها الشراب وكتنى طاكسي وحاضي من صحاب سي تسعين وحاضي من الماطرية عادي أنك فاللخر تشرب وتعرب طراه تحصيل حاصل نظرا لطريقة شرائه أصلا، لذا خاص الدولة تراعي للمغاربة وتنقص من ثمن الطاسة وترفع عليه التجريم ويولي يتباع فأي بلاصة وتدخل للمتاجر الكبرى وتلقاه محطوط حدا الخبز وبطاطا باش يتطبع معاه بنادم ويولفو كيف ما مولفينو في العالم، داك الساعة الى تقلب شي نهار شي رموك ديال الطاسة أنا مأكد أن المغاربة غادي يحاولو يساعدو الشيفور هو اللول عاد يدوزو يشفرو الطاسة عوض الكارثة لي وقعات دابا.