"الگارديان": المهدي بنبركة كان جاسوس. شد الف فرانك باش يفشي بمعلومات سرية على المغرب" وباحث: انتهازي لعب دور خطير فالحرب الباردة

نشرت صحيفة "الگارديان" البريطانية، اليوم الأحد، وثائق جديدة حصلت عليها من تشيكوسلوفاكيا اللي كانت تابعة داك الساعة للاتحاد السوفيتي على المهدي بنبركة، كتقول انه كان جاسوس.
وقالت الصحيفة فمقال بعنوان "الشاف دالمعارضة المغربية المهدي بنبركة كان جاسوس حسب وثائق من الحرب الباردة" أن هاد الوثائق اللي حصلت عليها واللي كانت لحد الساعة كلاسيفيي، كتفيد بأن بنبركة كان جاسوس ديال الأمن القومي التشيكوسلوفاكي، (بالتشيكية: Státní bezpečnost STB) وكان عميل مزدوج.
وأفادت الوثائق اللي نشرتها "الگاريدبان" البريطانية، بأن بنبركة ماكانش على علاقة غير بالحكومة فتشيكوزلوزفاكيا، بل كان كيشد الفلوس حتى من جهات اخرى مقابل توصيل معلومات عديدة.
وقال الدكتور جان كورا، البروفيسور المساعد فجامعة شارلز فالعاصمة التشيكية براگ: "بنبركة ديما كيوصفوه بالمناضل والمحارب ضد الكولونيالية ومن اجل العالم الثالث، ولكن الوثائق كشفات صورة مختالفة تماما، راجل كان كيلعب لعب خطير، وشخص انتهازي كان عارف قيمة المعلومة فسياق الحرب الباردة".
ومن بين المعلومات اللي فرشاتها هاد الوثائق، ان بنبركة فشتنبر 1961 شد 1000 فرانك فرنسي من عند الSTB من اجل تقارير على المغرب.
المهدي بنبركة اختفى ف 29 أكتوبر 1965 ففونتني لو فيكونت شمال فرنسا، وكان من السياسيين المغاربة، وأكبر معارض اشتراكي للملك الحسن الثاني وزعيم حركة العالم الثالث والوحدة الأفريقية.
https://www.theguardian.com/world/2021/dec/26/moroccan-opposition-leader-mehdi-ben-barka-was-a-spy-cold-war-files-suggest