باش يحببو السيونس للبنيتات الصغار.. إنتاج نسخة جديدة من "باربي" كتشبه لعالمة مشهورة – فيديو

كتوجد شركة "ماتل" (Mattel) المتخصصة فاللعب ديال الوليدات الصغار، لنسخة جديدة من مونيكا "باربي"، غادي تكون كتشبه للعالمة النكَليزية المشهورة جين كَودال (Jane Goodall).
الشركة الميركانية اختارت تدير نسخ ديال جين ومعاها أشهر نوع ديال الحيوانات اللي دارت بحوث علمية عليه، وهو شمبانزي سميتو "ديفيد كَرايبيرد".
وكالة "أ ف ب" الفرنسية، قالت بللي صناعة هاد المونيكا الجديدة (Barbie Jane)، اعتامد على الزبل ديال البلاستيك اللي روسيكلاوه، وغادي تكون لابسة لبسة كتشبه فيها للعالمة النكَليزية المذكورة، وهازا جوميل ودفتار فيدها.
العالمة قالت على هاد الموضوع بللي ماشي كَاع البنيتات باغيين يكونو نجمات ديال الفن، حيت كاين اللي باغيا تولي عالمة فحالها وهادشي غادي يحفزهم ويشجعهم.
وفايت للشركة المنتجة ل"باربي" صنعات من قبل نسخ ديال عدد من العيالات الناجحات فمختلف المجالات بحال نجمة التنس ناومي أوساكا، وسارة كَيلبرت اللي ساهمات بشكل كبير فإنتاج الفاكسان ضد فيروس كورونا.