فْضيحة الكويتي ” البيدوفيلي ” و ” رجال العدالة “

هاد لفْضيحة ديال الكويتي لي مغتاصب داك القاصر ..خص تتحاسب فيها أولا النيابة العامة او الجهة القضائية لي فتحات ليه الطريق باش يعلق بحالو من المغرب وعاطاتو سراح وفتحاتليه الحدود معززا مكرما مقطع فالبيزنيس كلاس ..
بالنسبة للبنت اذا كانت امها فعلا شدات لفلوس وفعلا واخدة خمسين مليون من عند الجاني وهذا هو المرجح فهاد البلاد لي رجعو فيها القوادات والقواود كيتكاترو أكثر من الباكتيريا ديال الطارووات … فخص داك خمسين مليون تشدها شي جهة قضائية نزيهة (إذا توفرت) وتصرفها دراهم وشقوفة وديرهم في خنشة كبيرة ديال الزرع وتضرب الدينديماها بداك الخنشة للكمارة هي وكاع هادوك لي توسطو فهاد القوادة (هذا اذا كانت فعلا شدات لفلوس )
اما الجهات العليا فالبلاد ولي من مصلحتها الملحة فهاد المرحلة ان البلاد متبقاش غادية فهاد “الدعارة القانونية” ..فهي مدعوة للتحرك بالزربة لمحاسبة كل المتواطئين في اطلاق هاد الكويتي وأي واحد بحالو … حيت داكشي لي كان جاري بيه العمل من قبل أعتقد دابا مبقاش يقدر يدوز حيت كلشي رجع تحت المجهر ديال ملايين المواطنين ..!!
ميمكنش تكون عندنا بلاد كنحسو فيها بالاحترام وبحب الوطن والكثير من “رجال العدالة ” للأسف باقين كيديرو هاد الفعايل ديال ولاد لق….ب !!