المغتصبة لي يقدرو يتعاطفو معاها المغاربة هي ديك المغنبرة لي لابسة طبقات ديال لحوايج ومكتخرجش من الدار.. لا أسيدي من حق البنت تدير آي حاجة فإطار القانون وحتى شي سلوك مكيبرر الإغتصاب.. ولي كيفكر هاكة راه مغتاصب من دماغو

أغلب الآباء ديال المتهمين بإغتصاب خديجة كانوا مركزين على هدرة وحدة ويقولوها ويعاودوا وهي أن خديجة كانت كتكمي وتحشش وتشرب ماحية وتعوم فالواد والقوادس، ومن خلال هاد الهدرة كنفهموا أن البنت لي تكمي وتشرب وتعوم فالواد هانية الى تغتاصبات، ولي بانتليه شي وحدة كتعوم فالواد وتسكر وتكمي غير يجرها من شعرها للزيتون او لشي غار ويسد عليها ويتوزها هو وصحابوا، وكذلك فالحادثة ديال سعد المجرد اللولة في فرانسا وحتى التانية باقي كاين بنادم كيردد ديك الهدرة ديال وآش داها تمشي معاه لوطيل، صافي غير مشات معاه فراه تلقائيا إما تحل رجليها بالخاطر إما راها كتقلب على الإغتصاب، أما دارت مناقص مكايناش فالقاموس المغربي.
المغتصبة لي يقدرو يتعاطفو معاها المغاربة، هي ديك المغنبرة لي لابسة طبقات ديال لحوايج ومكتخرجش من الدار غير مرة مرة ولشي حاجة مهمة، ولباسها مكيظهر حتى حاجة من التفاصيل ديال الجسد ديالها، والجسد ديالها أصلا على شكل كورة ديال الريكبي شبه بيوضوي ومن الأحسن تكون خويبة ومحجبة، ويوقفوا عليها شي رباعة بالسيوفة مع الطناش ديال النهار فباب دارها ويجروها لشي خلا يغتاصبوها وهي كتقاوم وباش يكون لمقاومتها مصداقية خاص تهرس شي واحد فيهم أو جوج حتى يوليو ضاربينها حتى تغيب عاد يغتاصبوها، هادي الوحيدة لي يمكن يتعاطفو معاها المغاربة، أما أي مغتصبة أخرى فراه كيبداو بشكل جماعي يلقاو مبررات وأسباب لي أدات للإغتصاب، كانت كتكمي كانت خارجة بالليل ، آش دوزها من تم، وهي كانت لابسة هاكاك، آش هدرها معاهم، علاش مشات معاه للدار، هي أصلا فايتة كتمشي مع الدراري،وبزاف ديال الأسباب القروسطية لي كتبرأ ما أمكن المغتصب وتدين المغتصبة.
وهنا راه حتى المجتمع مشارك فجريمة الإغتصاب وكيشجع عليها بهاد الفكر والمنطق والتبريرات، وكيما شفنا فالحادثة ديال الطفلة القاصر خديجة خرجوا بزاف ديال المشككين، والنصابة والبياعة والشراية باغين يسوقوا راسهم على ظهرها بالتشكيك فالرواية ديالها ولي القضاء هو لي مخول يحكم فيها ماشي بنادم فاليوتوب طالقها على ود الكليك وكالس كيناقش لاواه لوشام عندو عام لاواه عندو عامين، لا راه مشات معاهم بخاطرها، لاواه كتهدر ممأثراش، واخا يكون بصح هادشي كامل فراه كنهدرو على قاصر برهوشة، واخا تكون كتجري قلوانية فالزنقة ماتديهاش للزيتون وتجيب صحابك يركبو عليها كاع البراهش ديال الفيلاج توزوها، ملي كتسمع بحال هاد الهدرة وكتلقى الناس بعقلهم كيلقاو مبررات للمغتصب وكيدينو المغتصبة غير حيت كتكمي وتشرب وتعوم فالوا، ولي هادو سلوكات خاصة بالدراري وأي بنت تشبهات بالدراري يجوز فيها الإغتصاب، هادي هي الفكرة لي باغين يوصلوا دوك الناس، لا أسيدي من حق البنت تدير آي حاجة فإطار القانون وحتى شي سلوك مكيبرر الإغتصاب، ولي كيفكر هاكة راه مغتاصب من دماغو.