سولتك لله

سولتك لله
الزجال عمر حمداوي
تنجداد مدينة جميلة جدا بشهادة الجميع، ولكن الانتشار السرطاني للبغاء الذي تعرفه المدينة حرك ومزال يحرك أقلام الغيورين بقوة للتنديد بهذا الخبث، وفي هذا السياق تأتي قصيدتنا الزجلية التي أعتبرها رسالة لكل من يهمه الأمر.
يا من جانا من بلا كداي الرمل
مرحبا بيك فدارك يا ابن خالة
تنجداد بلادي وبلادك
والنظم في حقها ما يتسالى
يلا جاها المسكين زاوي
بجهد ربي ما يرجع خاوي
ويلا جاها المسكون هواوي
بجهد ربي ما يسخى بالزواوي
ويلا جاها السايح ناوي
يتمنى يولي صحراوي
تنجداد يا عش الخاوة
روضة من زارها يداوى
تنجداد لالة يا ترزاوة
زيدها مضغة
تزيدك حلاوة
تنجداد زينة
والزين المسرار
من بعيد يلالي
تنجداد حنينة
سعدات قاصدك
يا دار الوالي
والمقصود هو الله
سيدي ربي العالم بحالي
حالي حال واشمن حال
والغيرة علي وعليك تنادي
نبكي النهار والليل ومطال
عليك يا أرض اجدادي
***
علاش أبلادي
سوق الشوك
فيك دك خيامو
عار أودي عار
من دار لدار
تسمع كلامو
المشولفة1 تبيع أتشري
كلامها طعمة غرارة
واللي ما يفهم ما يدري
فالحين يجي فالصنارة
شوف اللي تعمى وبقى تما
وضرى حمارو بالشعير
يقول هذي ولا صداع ما
يهجر فراشو وينكر الخير
يخون بحسي مسي
ويسمي راسو شاطر
يدخل لدارو عبسي
ما يعطي لهلو خاطر
شوف عزري على وجهو مخبوط
يلا عرسو يا سيدي قجيبو محطوط
أمزال غادي حالف
ما يسخى بالفظايع
ما بين الهوى تالف
حول الجبل
لا تحول الطبايع
حتى سيد الحاج حج
وإمارات الحج عليه
غير ذاق الحدج
أحلف أ لالة ما يخليه
سولتك لله
فين غيرتك يا بلادي
على تراب غالي
ماتوا عليه الرجالة
شاهد ربي والجويجة2
فبيت الخزين مزالة
سولتك لله
فين غيرتك يا تنجدادي
على تاج العزارة
فسوق الدلالة
ما هما ضربوها بتزويجة
أ فالحرام دكو فلوس البالا
هذي خمرة يا بلادي
شربوها الكبار
حتى لقاع الكاس
هذي حفرة يا بلادي
طاحوا فيها الصغار
على عيون الناس
****
1 - المرأة العاطفية المندفعة إلى الشهوات الفاسدة
2 - البندقية التي تحتوي على رصاصتين