سلام حار وقبلتان على الوجنتين تبادلهما مزوار وابن كيران مباشرة بعد تعيين عبد الإله ابن كيران رئيسا للحكومة، حيث قام بزيارة لعدد من الأحزاب السياسية من بينها التجمع الوطني للأحرار. مزوار قال عقب الزيارة: «اللقاء كان جد إيجابي لتوضيح مجموعة من الأشياء.. هو ما عبروا عن خيارات وبرنامج وحنا عبرنا عن خيرات وبرنامج والنتيجة كانت لصالح العدالة والتنمية.. تخيلوا معايا بعد النتائج سي عبد الإله ابن كيران وصلاح الدين مزوار تلقاو وقالوا هاد الخلافات لي بيناتنا راه ماكاين حتى مشكل غادي نديرو حكومة.. جميع كانعتقد بأن هاذا غادي يعطي صورة سلبية لبناء الديموقراطية وما تعطيش مصداقية». ابن كيران قال بدوره عقب هذا اللقاء «هاذ اللقاء ماكناش لشي حاجة أخرى من غير توضيح بعض الأمور لي كانت بيناتنا … اليوم كاين الوضوح الكافي في ذهننا جميعا، ونحن بجهد الله سنكون حكومة قوية وهوما معارضة شريفة». بعد اللقاء افترق الطرفان من جديد بسلام وقبلتان أقل حرارة من سابقتيهما... بعد ثلاثين شهرا على لقاء دجنبر 2011 التقى ابن كيران ومزوار من جديد ليس كغريمين هذه المرة بل كحليفين، وطوال هذه الفترة التي فصلت اللقاءين ظل الاثنان يتبادلان القصف بينهما إلى أن اشتد في قضية «بريمات وزارة المالية». إذا كان اللقاء الأول لقاء مجاملة من زعيم حزب فاز في الانتخابات لغريم احتل المرتبة الثالثة، فإن اللقاء الأخير كان عمليا من أجل ملء مقاعد حزب الاستقلال الشاغرة في الحكومة، وبالتالي قلب تصريحات الرجلين بعد اللقاء الأول رأسا على عقب بعدما كانا قد صرحا بأنه من المستحيل العمل في حكومة واحدة، وأن ذلك يعد ضحكا على المغاربة. بمجرد ما أفرغ حزب الاستقلال مقاعد الحكومة من وزرائه وبعد أسابيع من الانتظار، حل محله حزب التجمع الوطني للأحرار مغادرا موقعه في المعارضة في أكتوبر 2013. نصيب التجمع الوطني للأحرار من هذا التحول كان ثمانية مناصب وزارية على رأسها حقيبة الشؤون الخارجية والتعاون التي كانت من نصيب الأمين العام للحزب صلاح الدين مزوار ليحل بذلك محل سعد الدين العثماني الأمين العام السابق لحزب العدالة والتنمية. خلال هذه الفترة كانت علاقة مزاور بابن كيران سمن على عسل لم يعكر صفوها إلا الانتخابات الجماعية لشتنبر 2015 التي لم يرضخ فيها حزب التجمع الوطني للأحرار لرغبة العدالة والتنمية في التحالف من أجل اقتسام «غنائم» الانتخابات سواء في رئاسة الجماعات والمدن أو خلال انتخاب رؤساء الجهات، وهو الشيء الذي دفع أعضاء وقياديين في حزب العدالة والتنمية إلى التنديد بما أسموه «التحكم» و«الخيانة» بعد أن ركب مستشارو الحمامة جرار البام في عدد من الجماعات والجهات. ومنذ ذلك الحين، لم يغب قط مصطلح التحكم عن خطابات حزب العدالة والتنمية، إلى أن ظهر فجأة في خطاب صلاح الدين مزوار، وبعد أن كان البيجيدي يلوح بالتحكم في وجه حزب الأصالة والمعاصرة، أشهره مزوار هذه المرة، في وجه حليفه ابن كيران، وذلك عندما تحدث يوم السبت عن محطة الانتخابات الجماعية خلال انعقاد المجلس الوطني للحزب معتبرا أن «أساليب عكست نزوعا نحو الهيمنة وإرادة التحكم في قرارنا الحزب المستقل»، وذلك في إشارة إلى حزب العدالة والتنمية الذي نعت مستشاري التجمع الوطني للأحرار بالخونة لتحالف بعضهم مع البام في بعض الجماعات والجهات. خرجة مزوار هذه المرة كانت بلغة كرة السلة رمية موفقة بثلاث نقاط، وهي اللعبة التي توفق فيها مزوار بفضل قامته الطويلة عندما كان لاعبا في صفوف الفريق المحلي لطنجة، فهل سيتمكن فريق ابن كيران من إدراك التعادل. كرونولجيا التلاسن على شكل حوار بين مزوار وابن كيران ابن كيران: ما فيدكش سمح لي سي مزوار ومايبقاش فيك الحال كيفاش غادي يثيقو المغاربة بأنهم غادي يجيهم الجديد معاك، ياك غير البارح المغاربة ما كانوش عارفينك، واش غاينساو المغاربة كيفاش وليتي رئيس للحزب ديالك؟ لو كان بقا سي المنصوري نقولو بعدا. سي المنصوري حيدو ليك إلياس العماري باش تولي أنت أمين عام ديال التجمع الوطني للأحرار، لأن سي المنصوري رفض باش يسمع ويطيع لإلياس العماري والهمة كثر من القياس فمنين غادي تجيب اليوم الاستقلالية ديال القرار ومنين تجيب القوة باش تحمل مسؤليتك إلا كنتي رئيس د الحكومة وتقوف فوجه التعليمات الي كاتجي من الناس لي كايدعيو القرب من المحيط الملكي. ما عندكش هاد القوة. دابا كايحديو المرشحين القدام ديال البام وكايعطيوهوم ليك ... وتايساعدوك ولكن أنت لي غادي تحمل أمام الله والشعب المسؤولية.. سمح لي ما فيدكش مشكل المغرب أسي مزوار ما شي مشكل فقط ديال الميزانية ماشي مشكل ديال الأرقام وماشي مشكل ديال نسبة النمو .. المشكل ديال المغرب هو مشكل سياسي.. خاصو حكومة مسؤولة كا تصرف في الصلاحيات اللي عطاها الدستور وقادرة باش تحكم هاد المغاربة، وتقول لي عندو الحق عندك الحق وتعطيه لو وتقول لي ما عندكش الحق ما عندكش وتوقف ف وجهو شكون ما بغا يكون إلى ما كنتيش كاد دير هادشي انا كانصحك ما تزيدش تورط لأن شحال ما تورطتي غادي يصعاب عليك باش تخرج. (نونبر 2011) مزوار: الإسلاميين ما غيوصلوش للسلطة في حديث لوكالة الأنباء رويترز قال مزوار الذين كان آنذاك يتحمل مسؤولية وزير المالية والاقتصاد «إن المغرب لن يحذو حذو دول عربية مجاورة في شمال إفريقيا بتسليم السلطة لإسلاميين خلال الانتخابات البرلمانية، لأن الديموقراطية لديه أكثر نضجا... الوضع المغرب يختلف جذريا.. المغرب ليس تونس ولا مصر ولا ليبيا... نحن لدينا تراكمات في البناء الديموقراطي والتمثيل السياسي، وهذا غير موجود في الدول الأخرى». (نونبر 2011) ابن كيران: عنداك تغلط صاحبنا مزوار لبارح كان جامع ألف واحد من رجال الأعمال في واحد البلاصة في الدارالبيضاء سميتها «بردايز» شوف غير السمية كي دايرة يعني الجنة. حنا جينا غير القاعة المغطاة بالقصدير ما كاين لا عشا لا بوزكافي هاد الإخوان ناشفين كثر من القياس. واحد الصحافية تكلمت معايا بالتلفون قالت لي راه مزوار هاش كيقول فيك.. هو قال لرويترز حنا ماشي بحال تونس ومصر ما غانخليوش الإسلاميين يوصلو للسلطة، قلت ليها قولي ليه واش في يديك انتا القرار ولا هاد الكلام تقال ليك، أنا قلت ليه قال لك عبد الإله ابن كيران أنت مهزوز سياسيا ولولا أن الذين وعدوك أنك ستكون رئيس حكومة لم يعد بمقدورهم الآن أن يوفوا بوعدهم لما قلت هذا الكلام. هاد السيد ما عندي حتى حاجة ضدو، راجل لطيف ولكن إلى بغا يكون وزير نشوف.. رئيس حكومة ما فيدوش ما عندوش جرأة، قال ليك غادي يوقف في وجه المستشارين ويقول لا... كيفاش انت عارف شكون لي جابك، وشكون لي طيح مصطفى المنصوري، عارف شكون لي حيد ليك رئاسة البرلمان والمستشارين، ومع ذلك تتحالف معاهم ودور في العدالة والتنمية، عنداك تغلط، عنداك ثيق في الناس لي كيوهموك وكاينفخو فيك وكاتعتقد غادي يعطيوك نصر سهل… (نونبر 2011) مزوار: إما هاد الحكومة تجلس فيما بينها أو تستقل أمام أزمة قيادة حكومة وأزمة قيادة تحالف. المشكل في آخر المطاف هو هناك حزب داخل الحكومة تغيرت قيادته (يقصد حزب الاستقلال) ولها مطالب مشروعة ومسؤولية رئيس الحكومة أن ينصت إليها والتعامل معها من منطق عقلاني. هناك 4 سيناريوهات إما هاد الحكومة تجلس فيما بينها أو تستقل لأن الاستقالة تأتي نتاج أنها وصلت الوضع إلى أزمة أو إعادة تركيب الأغلبية على أسس جديدة أو اللجوء إلى انتخابات مبكرة. (ماي 2013)ابن كيران: أش درتي لمغاربة ولهذا أنا باغي نقول لهذا السي مزوار غادي نصحك واحد النصيحة لله بعد على رئاسة الحكومة راه بزاف عليك... رئاسة الحكومة باش دير الفلوس داز وقتها، رئاسة الحكومة ديال الوجاهة داز وقتها، اليوم أخويا راه القضية سخونة وواعرة والشعب المغربي راه قهرو الخوف وكيطالب بالحقوق ديالو وخاص لي يجي يتكلم معاه بصراحة ماشي لي غادي يجي باش يتخبى في التلفزيونات، وأنا غادي نقول ليكوم واحد القضية. فالأول ديال الحملة تاصلو بيا ميدي أن تيفي قالو ليا غادي نديرو ليك واحد فاص أ فاص مع سي مزوار، قلت ليهوم أنا قابل مبدئيا غادي ناخذ الموافقة ديال الأمانة العامة نهار الاثنين. من بعد قالوا ليا مزوار متلاش بغا يجي معاك. قالوا لي واحد الاسم قلت ليهم هذاك ما تجيبوهش ليا، جابو ليا واحد المحامي قالوا لي غادجي بوحدك وغانجيبو الصحافيين، جابو ليا داك المحامي قلت له انت ما كنعرفكش جابوك حتى الخمسة ديال العشية. أنا كنقول لسي مزوار اليوم الثلاثاء نتلقاو أنا وياك فالتلفيزيون إلا كنت باغي تكون رئيس حكومة والجمعة يصوتوا على من بغاو.. أنا قابل.. (تصفيقات) اشرح لي أسي مزوار كي غادير تغلبني اليوم.. ف 2002 حنا جينا الثالثين وانت جيتي الرابع ولا الخامس ف 2007 حنا جينا الثانييين وانت جيتي الثالث ولا الرابع.. وجينا اللوين في عدد الاصوات في 2009 جينا حنا الاولين في المدن في الانتخابات المحلية.. اش درتي لمغاربة باش يعقلوا عليك ويصوتوا عليك وينساو العدالة والتنمية أسي مزوار؟؟ (نونبر 2011) ابن كيران: ما تصلاحش ليا !! لو كانت الظروف بحال قبل نفرح ليك حتى أنت غادوز شي أيام كوزير أول وتكون حتى أنتا، فهمتني.. ولا لا.. تبقى الدولة تعاونك حتى تدوز المرحلة، ولكن اليوم كاين دستور جديد وتيكلف رئيس الحكومة بمهام جديدة وهو لي كيعين المسؤولين وخصو يكون مسؤول، وكاينة ظروف سياسية جديدة، كاينة دول سقطت أنظمتها وكاين ارتباك وانتظار في الشارع. اليوم المعقول أسي مزوار لا أنتا ولا الناس لي كيدفعوك راكم غالطين بعدوا من هذا الانتخابات، حنا إلا دزتي بطريقة نزيهة وشفافة غادي نقول لها ليك من دابا هنيئا لك، ولكن متعولش عليا نكون معاك في الحكومة ديالك، ما تصلاحش ليا رئيس حكومة ما نرضاش، ما شي في المستوى، إلا كنا حنا في الحكومة وبغيتي تولي وزير يمكن أن نفكر في هذا ماشي مشكل وزير ممكن، ولكن رئيس حكومة ما يمكنش ليك ما عندكش القدرة السياسية، وما عندكش الإمكانيات باش تقول هذا الكلام. أنا متأكد أن الناس لي قالوا ليك تقول هاذ الهضرة وشجعوك وصلاتهم إحصائيات وتخلعوا، وشافوا العدالة والتنمية كيفاش كيتجاوب معاه المجتمع، وشافوا الأمين العام ديالو كايدخل في المحبة ديال الجماهير وكايخرج في المحبة ديال الجماهير وشافوا العدالة والتنمية غادي ينجح في الانتخابات وقالوا ليك قول هادشي باش الرأي العام الدولي يغير الموقف ديالو.. ولكن حنا ما بانينش على الرأي العام الدولي... غدا حتى وإن نُجّحتم لن تذهبوا بعيدا.. (نونبر 2011) مزوار: ما نبقاوش ندوخو المغاربة بالهضرا طريقة التعامل مع الأشياء هي طريقة غير أخلاقية وغير سليمة، الواحد فاش ما كيقدرش يدير شي حاجة يقول ما قدش ندير ما شي يحمل المسؤولية للآخرين، حنا دبرنا ثلاثة أزمات وعمرنا ما قلنا للمغاربة راه الحركة وقفات... واش المغربي حس بأن كاين هناك أزمة، لأننا نعرف تأثيرها على نفسية المواطنين وباقي الشركاء لذلك أخذنا خيار حافظنا فيه على دينامية النمو واجهنا ارتفاع الأسعار. الحكومة مسؤولة على تدبير الشأن العام كيفاش ما جابت حتى مقترح لإصلاح صندوق المقاصة يعني كنهضرو في الخوا كنهضرو على النوايا.. ما نبقاوش ندوخو المغاربة بالهضرا.. رئيس الحكومة التزم أمام الرأي العام الوطني في البرلمان بأنه عمرو ما غادي يمس الاستثمار العمومي هاهو مسو اليوم، التزم بأنه غادي يحافظ على القدرة الشرائية للمواطنين هاهو زاد في الأثمنة التزم بأنه يرفع الحد الأدنى للأجور هاهو ضرب القدرة الشرائية التزم بأنه غادي يشغل، ماكاين تشغيل، أين هاد الالتزامات كانغطيو الشمس بالغربال كيفاش، عندمانقول أن اللي كانوا كيدبروا الأمور قبل منا هوما سبب المشكل. (أبريل 2013)ابن كيران: حتى هو ما حشمش ...أما واحد اخور سامحه الله حتى هو ما كانش رئيس وما شي ديال الرئاسة وحتى هو حيد رجل معقول كانبغيوه ويبغينا، وهموه بأنه غادي يكون رئيس حكومة جمعوا ليه ستة ديال المانطات وهو الثامنة يصحاب لو غير غادي يتجمع غادي يغلب العدالة والتنمية ويجي هو الاول وغادي ياخذ رئاسة الحكومة وغادي يعرض على الوزير الأول السابق ويعطيه أتاي.. ودابا يشرب أتاي معا راسو، حتى هو ما حشمش.. الفلوس لي كاتيسمى خذا.. ما بقاش فيا هادوك الفلوس ديال البريم في وزارة المالية، كاينين ولكن لي بقا فيا، كاين وزراء خداوهم ووزراء ما خدوهومش والموظفين كا يخدوهم بقرار من الوزير ما عندي ما نقول، ولكن انت وزير، موظف معاك وقعتي لو على ثمانية مليون ولكن انت عطيتيه يوقع لك علاش، ياك كادير حاجة قانونية وقع لراسك وديرها ديال الرجال، ما بغيتش نجبدك أسي مزوار، ولكن سمح لي الله كايقول لا يحب الله الجهر بالسوء إلا من ظلم، ما تجيش للحكومة لي وزراء المالية ديالها بجوج حتى واحد قرر ما يخاذ هاديك لا بريم وتعايرها. (2012) مزوار: حذاري من تجاوز الخطوط الحمراء ملي دخلنا للحكومة كان الوضع مأساوي كان الوضع غادي في اتجاه لا تحمد عقباه ورجعنا القطار للسكة ورفعنا من أداء الحكومة والبرلمان... الحزب سيبقى مخلصا للوطن ولثوابته ومبادئه ولن يسمح في أي مرحلة من المراحل أن يخون الوطن، الحزب اختار المعارضة بعد سنة 2011 ولكن بعد ذلك غادرها بعد أن استجاب لنداء الوطن والمسؤولية... نحن نتعامل بطريقة ولاد الناس، ولكن حذاري من تجاوز الخطوط الحمراء ويفهم اللي يفهم... هناك من يريد أن يوهم الرأي العام بفشلنا ويخلق البلبلة داخل الحزب، أقول لهم موعدنا في انتخابات 2016 وستعرفون من هو حزب التجمع الوطني للأحرار وعلى ماذا قادر... (دجنبر 2015) ابن كيران: ما تجبدونيش واحد الله يهديه كنحتارموه وكايترأس واحد الحزب وهو ما عندو علاقة بشي رئاسة قال يجب الإسراع بالتخلص من حكومة ابن كيران، إلى كانت أخويا في يديك عنداك تخلي دقيقة واحدة حيدها من دابا، هادي حكومة جات بإرادة المواطنين، واحد آخر مشى كايقول ليهم بأن هاد الحكومة كتخلق عدم الثقة عند الأجانب.. . أنا ما باغيش نعيب على شي واحد خذا شي حاجة غير يشرح لينا كيفاش خدا بهاد الطريقة، بغيتي تاخذ خوذ انت وزير عندك الحق، بغيتي تاخذ على حساب داك شي لي خداو لي قبل منك خود ولكن ماتعطيش لواحد الموظف خدام معاك يوقع ليك انت وقع لي عندك الحق انت الرئيس ديالو، داكشي كاتعتبر غير سقاطة... ما تجبدونيش راه إلا جبتوني حتى أنا كنعرف ندافع على راسي. (شتنبر 2013)
