تهكم البرلماني عن حزب العدالة والتنمية محمد خيي على طريقة استحواد عزيز أخنوش الأمين العام لحزب التجمع الوطني للأحرار على الوزارات القوية في حكومة سعد الدين العثماني التي تتعرض لإنتقادات واسعة قائلا: نصائح في الطريق نحو الوزارة … باش تكون وزير الفلاحة… والصيد البحري …والتنمية القروية … والمياه …والغابات … ومنعرف آش آخور… وتحافظ على هذه الحقيبة لمدة تفوق عشر سنوات ! كانك الملاك المبعوث رحمة للفلاحة والفلاحين والمغرب الأخضر … خصك تكون اولا ماترشحتيش و ماتقدمتيش للانتخابات ! ومادرتيش الحملة ، وما مسوقش للأحزاب … ولا للسياسة وما عمرك وعدتي الناس بالحفاظ على الاصوات ديالهم ، ولا عمرك جبتي الهدرة على الارادة الشعبية و خصك تكون سبق لك قلت انك ستعتزل العمل الحزبي والسياسي … و من بعد ما فيها باس تولي زعيم بالباراشوت في ليلة وحدة وجيبولك عرام مخلط ديال الاحزاب وتدخل بهم السوق و تبع و تشري و تجمع القاعة … و باش تكون وزير الافتصاد والمالية … الحقيبة التي لا يفرط فيها اي رئيس حكومة في العالم فاز بالانتخابات ، وتحافظ على هذه الحقيبة من حكومة الى حكومة … رغم الزلزال الذي ضرب كل الحقائق الاخرى ، والتغييرات التي عرفتها التشكيلة وتغيير أماكن اللعب لمن حافظ من الاعبين السابقين على موقعه في التشكيلة ، و تكون فيها بوحدك لا شريك لك ، ما معاك لا وزير منتدب ، لا كاتب دولة ، لا وزير دولة ، خصك تكون راكب مع مول الفلاحة والمازوط والحوت والغابة و الما والضو …خصك تكون سبقت دزت والي … و مصبوغ بلون حزب ما عندو حتى لون … و عندو غير 37 بلاصة ولكن قادر تبرهن بالألعاب السحرية ان 37 أكبر من 125 … باختصار باش تكون وزير الاقتصاد والمالية خص الحزب ديالك يكون فشل في الانتخابات والسلام . وباش تكون وزير الصناعة …والاستثمار …و التجاورة والاقتصاد الرقمي وما نعرف شنو آخور ، لابد خصك تكون مع موالين الفلاحة والتنمية القروية والمازوط والحوت والغابات والفلوس والمالية والاقتصاد … حيت هادشي كيمشي جملة مع بعضو …."باكيج " زعما . وطبعا خصك تكون ما عرفتي كَاع الانتخابات لمن كايقولوها و شوف تشوف واش مسجل في الاوائح الانتخابية … والاهم من ذلك انك عمرك ما هدرتي على الارادة الشعبية . وباش تكون وزير العدل …والحريات …خاصك تكون من نفس الحزب اللي ما تنافس لا على الرتبة الاولى لا الثانية لا الثالثة … فقط خصك تكون مع موالين الفلاحة و الصيد البحري والتنمية القروية والمياه والغابات والاقتصاد والمالية والصناعة والتجارة والاستثمار والاقتصاد الرقمي والسياحة … باش تكون وزير الشباب والرياضة ايضا خصك تكون مع هاد المجموعة اللي انهزمت في السياسة ولكن نجحت في التفاوض و نجحت في البلوكاج و حافظت على حقوق الأقليات البرلمانية و عموما باش تكون وزير فشي حقيبة مهمة ( الداخلية ، الخارجية ، الاقتصاد والمالية ، العدل والحريات، التجارة والصناعة والاستثمار ، السياحة ، التعليم و التربية الوطنية و التكوين المهني ، الصحة ، السكن، …) خاص تكون من الحزب اللي ماجش الاول في الانتخابات برقم قياسي في المقاعد والاصوات تحت القصف والحصار … اما اذا زغبك الشيطان وكنت ضرباتك تلفة، وكنت من الحزب المتصدر للانتخابات وتؤمن بالارادة الشعبية وترشحت وفزت بالمقعد ديالك مع الحزب اللي جددوا فيه الناس الثقة و اللي حقق ننائج غير مسبوقة وانتصر على آلة جهنمية حاربتو بكل الوسائل واشتغلت ضده …و مع ذلك بقى واقف حيت وقفو معاه المواطنين وساندوه وصمدوا معاه ، وكنت باغي شي وزارة لا قدر الله … خصك اولا تكون مستعد باش تقول ان الحزب ديالك انتصر للارادة الشعبية في جميع الظروف ، وخى يكون منهزم ويكون وقع اللي وقع… و ثانيا تختار بين كتابة الدولة في التنمية المستدامة وبين كتابة الدولة في الصناعة التقليدية او كتابة الدولة في النقل بدون نقل جوي … وفي أحسن الأحوال وزارة العلاقة مع البرلمان او وزارة الاسرة او وزير حقوق الانسان … هادشي اللي بان لي والله اعلم ، واللي ما عجبوهش هاد النصائح يعمل اللي قالو عقلو والسلام عليكم ورحمة الله .
