علمت "كود" أن هادي شحال من عام، باش كانت ترفعات شكاية للنيابة العامة فأگادير بخصوص خروقات كثيرة فيها الرشوة والجنس مقابل الماستر والحصول على شواهد بطرق ملتوية كان الوكيل العام القديم تما كيحفظ گاع الشكايات. ولكن مؤخراً، قضاة المجلس الأعلى للحسابات قررو يبحثو فالموضوع وحالو ملف الرشوة والجنس والتلاعبات على الفرقة الوطنية للشرطة القضائية بالدار البيضاء باش تبحث في الموضوع، خصوصا وأن المحققين لي تكلفو بملفات الجنس مقابل النقط والمال مقابل النقط فسطات كانو حرايفية وسالاو مع ضوسي الفساد فكلية الحقوق سطات. مصدر "گود" أكد أن الفرقة الوطنية ديال البوليس قربات تسالي لونكيط ديالها فهاد الملف وتحيلو مباشرة على النياية العامة باش تسطر فيه المتابعة. وعلى حساب مصدر "گود" القريب من مجريات التحقيق فكاين مسؤولين مزالين فجامعة ابن زهر فأگادير وآخرين غادروها ومشاو لمناصب أخرى، منهم واحد تعين رئيس جامعة وكان كيشغل منصب نائب رئيس جامعة ابن زهر، ومعه حتى الرئيس القديم ديال نفس الجامعة. هاد ليامات كاينة حملة مزيانة ديال محاربة الفساد والمفسدين فمجالات القضاء والتعليم العالي، وهاد الفضيحة مغاداش تدوز بخير، لأن فيها حتى برلمانية وموظفين متورطين بشكل مباشر. الناس خذات ديبلومات ماستر بهاد الطرق ودفعات بها للدكتوراه. يمكن هاد الشي لي مخلي هذا الرئيس اللي كان نائب رئيس جامعة أگادير فذاك الوقت هاد ليام ماشي هو هذاك نفسيا وفكريا واللي لاحظوها مقربين منو، خصوصا وأن قضاة المجلس الأعلى للحسابات راجعين السيمانة الجاية لعندو للبيرو .
