كيفما توقعات "كود" بدا اليوم قاضي التحقيق فاستئنافية كازا الاستماع ل21 متهم فقضية ما يعرف ب"اسكوبار افريقيا". كانت البدية غريبة. حقاش ما يمكنش تستامع ل21 متهم فنهار واحد. الدليل ان متهم بحال سعيد الناصري رئيس مجلس عمالة انفا داز الرابع وكان من المفروض يكون هاد الشي فالصباح وما تقدم لقاضي التحقيق حتى الثلاثة وفق مصادر "كود". غير هو هاد التقديم عرف مستجدات خلات قاضي التحقيق يؤجلو حتى 7 فبراير وفق مصادر "كود". علاش هاد الشي؟ على قبال عدم تمكن محاميه من محاضر استماع دارها قاضي التحقيق البارح 24 يناير 2024 لكل من المالي٬ تاجر المخدرات المعروف باسكوبار افريقيا اللي جابوه من الحبس٬ بالاضافة الى طليقتو المغنية المعروفة لطيفة رأفت وسامية طليقة رئيس الجهة الشرقية عبد النبي بعيوي تضيف مصادر "كود". المحامون ما كانش فراسهم هاد الشي. طبيعي خاصهم يطالعو على تصريحاتهم لقاضي التحقيق. دابا بالنسبة للناصري تأجل الاستماع ليه ل7 فبراير 2024
