في حواره مع "كود" يشرح ولد نجيب الرفوش المعروف بولد العروسية حيثات ابعاده من الاتحاد الاشتراكي التي كان مثلها في الانتخابات البلدية الاخيرة. نجيب الرفوش قصف القيادة المحلية واشاد بحكنة وتجربة ادريس لشكر. لنسمع الى سياسي مثير للجدل اثناء وخلال وبعد انضمامه الى حزب الاتحاد الاشتراكي زمن "المحنك" "كود": علاش استاقلتي من الاتحاد الاشتراكي؟ هادوك الناس بوحدهم اخويا. ما عمرني شفت شي حزب بحالهم. "كود": شكون هما وعلاش فشي شكل؟ كنهدر على قيادة الاتحاد الاشتراكي فمراكش. انا اختاريت الحزب بللي شفت صورة ادريس لشكر اللي كنعرفو باللي كنت فالبرلمان وهو رجل محنك نشيط فاللجان. الشوفة اللي فيه هي اللي شفتها فالحزب "كود": ما لك مع الاتحاديين فمراكش؟ نكول ليك اخويا "كود"، شفتي هاداك المنسق الاقليمي للحزب والاعضاء اللي معاه راهم ما عندهم علاقة بالسياسة . مساكن ناقصاتهم التجربة. واش الحزب عريق وعندو تاريخ وهما باركين كيهرسو فيه وما كيخدموش الحزب. انا شفت احزاب كثيرة كنت فالتجمع وفالاتحاد الدستوري فالاصالة والمعاصرة ما عمرني شفت شي ناس بحالهم "كود": ياك انت جيتي للحزب لانو عزيز عليه لشكر واش اتصلتي بيه بعد ما سمعي جراو عليك؟ السي ادريس غادي نشوفو فهاد القضية وغادي نتصل بيه. واش انا فحزب وهما كيصابوتيو في. ياك حنا مغاربة ولكنا كنكبو فجهة وحدة علاش هاد الشي علاش. انا ما قدمتش استقالتي. راه هادوك اللي عندهم حرب بيناتهم "كود": دابا واش انت مستاقل ولا مقال؟ كيف ما درت ليك، انا ما قدم لا استقالة لا والو. هادوك عندهم حرب بيناتهم. واش اللي ما عندهمش حتى مقر وكاعدين غير لقهاوي تخدم معاهم "كود": ودابا دوختينا واش رسميا انت مستقيل ولا قالوك؟ انا سمعت الهدرة وما بقيتش معاهم. انا بصفتي كسياسي جيت بسبب الشوفة اللي شفت فيه ادريس لشكر. راه رجل عظيم وما عندهمش شي واحد بحالو ونهار يمشي مشى الحزب. وراه كاين لوبي كيقلب كيفاش كيهرس الحزب "كود": اذن نهار خذيتي التزكية عطاها ليك لشكر؟ انا قلبت تزكية الاتحاد لان لشكر بالنسبة لي قدوة. فوجه ادريس وفوجه حزب عريق قبلت التزكية. اما هادوك اللي فمراكش راه ما عندهمش علاقة بالسياسة. وراه ما نجح حتى واحد فيهم فالانتخابات. واش ما كايناش العقلانية عندهم. لبلاد غادية القدام وهما كيهدرو فشي حوايج غراب. راهم كيقلبو غير يهرسو "كود": باين لي ندمتي باش اختاريتي الاتحاد؟ اللا ما ندمتش. نادم على المسيرين دياولو فمراكش ماشي على الحزب. هادوك ما عندهمش علاقة بالسياسة. وراه يا خويا "كود" كيكعدو فكاراج ما عندهمش مع سياسة القرب. خاص السي ادريس يشوف هاد الشي. وحتى باش كيكعدو فاجتماع، ما كيحطوش حتى قرعة الما. كيدوز الاجتماع غير بالدفال. واش هادا اجتماع. وراه عندهم رجال ونساء كبار. واش اللي عندو ثمانين عام غادي يدير شي حاجة وفين التشبيب والتجديد "كود": اش نو مستقبلك السياسي دابا؟ هاد الشي مازال جديد. كنفكر وغادي نحدد. انا ولد مراكش وولد السياسة وعندي ناسي ونقي ومع المواطنين وما عندي مشاكل فالمحكمة. من حقي ندير السياسة ومع التجربة اللي عندي نقدر نمشي فين ما بغيت "كود": شكون الحزب اللي قريب ليك؟ كلهم ناس مزيانيين ما كاينش الخايب فيهم "كود": كنتي كلتي باللي بغيتي دير ثورة فالاتحاد الاشتراكي فمراكش؟ طبعا كنت باغي نخدم الحزب ونخدم المدينة وعلى هاد الشي درت ندوة صحافية ودرت مع ناسهم فمراكش ندوة صحافية. بغيت نخدم ودابا جمدت عضويتي "كود": انت عزيز عليك لشكر ولا قنعك غادي تقبل؟ شوف اخويا ايلى بغيت نعيش 60 عام مع هادو غادي نعيش غير 50 عام. راني جربتهم وجربت الاحزاب الاخرى. واش ايلى دخلتي عندهم كيطلعو فيك بحال ايلى داخل لكوميسارية "كود" شفتك فحوار كتغزل فالعدالة والتنمية ياك ما باغي تمشي عندهم؟ ما عنديش فكرة. انا كلت غير راه بنكيران رجل طيب. عطيت رأيي فراجل عرفتو فالبرلمان وجاوب على سؤال. السيد كلشي كيحتارموه. العدالة والتنمية اصدقاء دياولي وما عنديش معاهم مشكل "كود": يمكن تنضم ليهم فمجلس المدينة وتصوت لصالحهم؟ نهار كال لي الحزب ما تحالفش معاهم انضبطت ومشيت فالتحالف اللي كالو لي. دابا وحقاش انا الوحيد اللي دزت منهم غادي ندير السياسة فصالح المدينة
