فاش كنا كانقراو عام على عام كانسمعو هاد الجملة من عند شي استاذ " نتوما اكلخ قسم داز عندي … ! ايه على يامات دوزناها مع تلاميذ بعقلهم… مستوى عالي عليكم نتوما ا الخوشبيش" اوك المستوى ديال التلاميذ غادي و كاتقواد عليه تاواحد مايقدر يقول العكس و بصح ملي ولينا كانشوفو تلميذ مدخل معاه كاطورزة للقسم راه خاص المرود يدخلو يقريوه! و لكن المستوى د الاساتذة فيناهو ؟ علاش مانسولوش الاستاذ كي كنتي يا استاذ و كي وليتي ؟ فالثمانينات و التسعينات قبل داك المد الداعشي مايكتاسح الجامعات المغربية ! كانو عندنا معلمات و استاذات زوينات كايفتحو الشهية على القراية ! شحال من واحد فينا فالابتدائي كان مزعوط فمعلمتو كايقول مع راسو " كون غير كانت ماما" ! تايتخايلها ماماه كاتمشط ليه راسو الصباح و كاتبوسو ! و شحال من بنت كان الحلم ديالها تولي معلمة أو فحال المعلمة حيت كاتشوف فالمعلمة ديك المرأة الزوينة البوكوصة لي مهلية فراسها ! تقدر ماتتخايلش راسها فحال مها لي ولداتها و تتخايل راسها فحال المعلمة لي كاتشوفها قدوة ! يامات العز فاش كانو المعلمات و الاستاذات كايلبسو الصاية و الطايور مخيط عند الخياط نعام ا سيدي و دوك القوامج بالفريفرات و ليزيبوليط ! يامات المعلمة الريحة ديالها كاتفيق القسم كلو … ماكاين غا الشانيل و مادام روشا كاتشاير … و البروشينغ و الصباغة و كوب سطون و كوب à la lionne ! فاش كانت المعلمة و الاستاذة ايقونة جمال فالمؤسسة و مظهر من مظاهر الحضارة! البراهش كايبغيوها تكون ماماهم و المراهقين كايضاربو على شكون غايجلس فالصف القدامي باش يشوف الاستاذة …المضاربة على الصفوف الأمامية فحال المضاربة على التيكيات ديال الديربي! هادشي كان فيامات العز ! قبل المد الداعشي و قبل ماتولي الجامعات المغربية مركز لتفريخ بزاف ديال الهايش مايش و شوية لي فيهم الضو! قبل مانوليو كاندخلو لشي مدرسة كاتلقا كلشي فيها مخشي وسط الدرابل ديال المجاذيب و البيجامات د الموبرا تحت الجلالب ! استاذة كاتسارا بالصابو وسط القسم فحالا عند بالها راها فرملية فقسم الانعاش فالسويسي! و الاساتذ جاي بالصنادلة د الجلد فحالا عوال يوقف على الكروسة د خودنجال! فيناهي الصاية ؟ باح! فيناهي مادام روشا؟ عوضاتها ريحة جافيل و المسمن! هادشي على مستوى الصورة ! الجمالية !الاستيتيقا !و لي واخا تقدر تبان سطحية لشي وحدين و لكن راه كاتعطيك العربون على شكون هو داك الاستاذ! منين جاي ؟ فين كابر ؟ و اينا تلميذ غايعطينا ؟! حيانا الله من بعد ماكان الاستاذ و الاستاذة قدوة فالذوق و النقا و الشياكة ولينا كانشوفو استاذة ديال الفلسفة كاتمنع النقاشات داخل القسم و كاتقول للتلاميذ قراو لهاد الفيلسوف و لكن ماديوش عليه راه كان غي كايخربق ! و استاذ ديال الرياضيات كايفرق بين الدراري و البنات فقسم لي مطلوب انو يكون فيه اختلاط حيت حنا ماعايشينش فالسعودية ! و لا فولاية الرقة فالدولة الاسلامية باش نمنعو الاختلاط! واستاذ ديال التربية الاسلامية مؤخرا كايفرض على البنات الحجاب فالقسم…بعد ماكانو المغربيات كايلعبو الرياضة بالسيكليزم و الشورط فالسبعينات… انا شخصيا فاش كنت فالليسي كان عندنا استاذ ديال التربية اسلامية كايقولينا بلي الفلسفة ماصالحة لوالو كمادة غي كانضيعو فيها الوقت حيت الفلسفة جائت لطرح الأسئلة و دابا ملي حنا عندنا القرآن الكريم لي فيه كاع الاجوبة فعلاش كانقراو الفلسفة ؟ واحد آخور كان قالينا بلي الأوروبيين لحمهم بيض يا العياذو بالله وكاتشوف وجوهم صفرة الله يستر حيت كاياكلو الحلوف ! وحدة اخرى استاذة د العلوم الطبيعية يا حسرة كانعقل عليها قالت لينا نظرية داروين نظرية مابقاتش كاتدرس فالجامعات الاوروبية و الغرب سد و طوا هاد الموضوع ! بزاف د الأساتذة كذبو علينا ! و دلسو حقائق ! و قمعو نقاشاتنا و اسئلتنا … و بغاو يصنعو منا حوالا ! و داكشي لي كاين حيت بزاف فينا ولاو حوالا! و لي ماتاحتش ليهم الفرصة يقراو اكثر و يتعمقو اكثر و يحلو دماغهم و يكتاسبو حس النقد راه مازال متيقين بيلا الكور وجهم ملس و صفر حيت كاياكلو الحلوف و الفلسفة هضرة خاوية حيت القرآن فيه كلشي ! ايه دزنا عند اساتذة اذكياء و استاذات زوينات قادات ايقونات فالحضارة و الشياكة و المعرفة !نورونا ونورو عقولنا و شدو بيدينا … و لكن فيناهوما هاد الناس دابا ؟ غادين و كايختافيو بشوية بشوية لي مامشاش مع الديبار فولونطير راه مشا مع التقاعد النسبي و غايخليو لينا الحرتوكة ديال المجتمع تصنع لينا حرتوكة فحالها ! كي الاستاذ كي الأب كي التلميذ كلهم مسقيين بمغرفة وحدة ! مغرفة القادوس الأعظم !
