سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
سؤال "سري جدا" لسيدي محمد نبيل بنعبدالله: واش معقول حزب شيوعي سابق كايضرب الطم على ممارسات قضائية وأمنية ماكاتحتارمش الحريات الفردية ديال لمواطنين، بل وحتى الحريات الجماعية والعامة؟؟
عبد اللطيف اكنوش أستاذ باحث بجامعة الحسن الاول سطات /// يوم السبت في الرباط، الأمينُ العامُّ لحزب التقدم والاشتراكية سيدي محمد نبيل بنعبدالله والقياديين للي معاه، تجمعو معا الأمين العامّ لحزب العدالة والتنمية، عبد الإله بنكيران، والقياديين ديال البيجيدي…موضوع اللقاء كان هو "التشاور" بين الحليفين في الحكومة، في أفق الانتخابات التشريعية ديال أكتوبر القادم…وكانت هاذي مناسبة باش يتكلمو شويا على العمل للي داروه من 2011 في الحكومة، وباش يقليو ليا السم لكاع هاذوط الرهوط ديال المعارضة ديالهم من البام حتى الاتحاد الاشتراكي… جوج ديال النقط للي ثارت انتباهي…اللولة كاتعلق بالعلاقة المتوثرة ديالهم مع الناس للي مامتافقينش معاهم… والثانية كاتتعلق بتبرير سيدي بنعبدالله للتحالف ديالو معا البيجيدي… فيما يتعلق بالخصوم السياسيين ديال الحزبين، سيدي بنعبدالله قال بللي " هناك أطرافا مختلفة تسعى إلى إجهاض التجربة الحكومية الحالية قبل أوانها…وهناك من يقولُ لنا، وما زالَ في عمُر الحكومة ستة شهور، كفى، وكأنهم يريدون أنْ يمارسوا علينا الحِجْر"…ولكن ديما بطريقة التقلاز من تحت الجلابة وبدون ما يقول لينا شكون هيا هاذ الأطراف؟ وشكون للي كايقول هاذ الكلام للي مايمكن يصدر إلا عن ناس ماعندهوم عقل…شكون هاذ المسطي للي غادي قول للحكومة، باراكا عليكم وهزوا قلوعكم علينا قبل ماتنتاهي الولاية ديالها؟؟ علاه الدنيا فوضى ولا؟ لا آسدي كملوا العمل ديالكم حتى لنهايتو، وفي أكتوبر المواطنين غادين يا إما يقولو ليكم ك"كملو"، ولا "سيرو بحالكم"..من غير الناخبين، ماكاينش للي عندو الحق يقول ليكم شي كلمة… بالنسبة للنقطة الثانية ديال تبرير التحالف معا البيجيدي، سيدي بنعبدالله قال ليك أن الحزبين بجوج عاندهوم واحد الحاجة مشتركة، وهي أنهوم انطالقو بجوج من واحد "الحركة ديال المراجعات" الفكرية والسياسية…بالعربية وتاعرابت أن البيجيدي ما بقاش إسلامي حتى لتما، والتقدم والاشتراكية ما بقاش حزب شيوعي حتى لتما…بالنسبة ليه هو كايقول :" "نحنُ نؤمنُ بقيمة التأقلم والتكيّف. شيوعيو الأربعينيات ليسوا هم شيوعيي اليوم"…التأقلم والتكيف، يعني "الراس للي مايدور كدية"، وعندو الحق…السياسة هاذي، باش بغيتي تشارك في حكومة كايقودها حزب إسلامي وتكون حتى انتا وزير، إيلى ماتفكيتيش من ذيك المصيبة ديال الشيوعية ونسيتيها؟؟ بالنسبة للبيجيدي، كايلممح سيدي بنعبدالله بأن هاذ الحزب حتى هو كايتأقلم وكايتكيف معا الظروف، المسألة القديمة ديال "أفق تطبيق الشريعة الإسلامية في المجتمع وفي الدولة"، نساها سيدي بنكيران وصحابو لسبب بسيط، هو أن النظام السياسي في المغرب حتى هو "إسلامي" واحد الشويا، والملك أمير المؤمنين هو للي مكلف بجميع أمور الدين الإسلامي، والواحد هو يعرف منين كاتكال الكتف…وهنا كانتافق معا سيدي بنعبدالله واحد الشويا…لأن مسألة المرجعيات ديال زمان مابقاتش موضوعة في جدول الأعمال ديال الحزبين بجوج…دابا كاينين في الحكومة، وخاصصهوم يتأقلمو أكثر ويتكيفو أكثر باش يبقاو ديما هوما للي شادين زمام الأمور.. غير هو، الله يجازيك بيخير أسيدي بنعبدالله، نصح صحابك يفكو الارتباط بذيك المصيبة ديال "حركة التوحيد والإصلاح" راها باينة ليا مامتافقاش معاك في هاذ الطرح للي مشيتي ليه، وانتا بلاشك راك عارف هاذ الشي…راه عندك بزاف ديال الزملاء ديالك في الحكومة أعضاء في هاذ البيعة وشرية ديال الحركة المعلومة !! بالنسبة ليا عندي واحد السؤال بالنسبة لهاذ الشي للي قالو صديقي نبيل بنعبدالله… واش "المراجعات الفكرية والسياسية" للي كيدوي عليها يمكن تمشي إلى حد التشطيب النهائي على "قيم اليسار" المتعارف عليها عند الشيوعيين القدام وللي مابقاوش شيوعيين حتى لتما؟؟ واش معقول حزب شيوعي "سابق" كايساند سياسة جنائية تنتمي للعصور الوسطى، وما سمعناش عليه استنكر ولا شجب ولا قال شي كلمة كايعبر فيها على انتعاضو مما يجري على الساحة الاجتماعية هاذ ليامات؟؟ واش معقول حزب شيوعي سابق كايضرب الطم على ممارسات قضائية وأمنية ماكاتحتارمش الحريات الفردية ديال لمواطنين، بل وحتى الحريات الجماعية والعامة؟؟
