سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
واش سدينا قوس الديموقراطية مع طرد بنكيران؟ محلل ل"كود": محمد السادس بقى فتطبيق الدستور والبي جي دي اما يحني الراس ولا غادية علاقتو تتوثر مع القصر وترجع لسنوات كثيرة واللعب السياسي فيد المخزن دابا
واش سدينا القوس ديال ما يسمى الانتقال الديموقراطي البارح الاربعاء 15 مارس 2017 باش خرج بيان الديوان الملكي وقال لبنكيران سير فحالك؟ هاد الشي فيه نقاش وفيه مواقف كيحددها الانتماء الحزبي ووووو. هي صعيبة بزاف يحيد للحزب اهم لاعب ديالو وتحملو فشل تشكيل الحكومة والحال انه ماشي هو اللي فشل فتكشيلها بل الظروف اللي خلقو ليه اللي فشلاتو. السيد تعين نهار 9 اكتوبر 2016 ناض كالو لصلاح الدين مزوار ارا سوارت التجمع الوطني للاحرار وجابو عزيز اخنوش اللي كان قال ساليت من السياسة ودخلوه لحزب استقال منو وولى رئيسو؟ هاد الشي كلو بنكيران تسنى حتى يدير حزب التجمع الوطني للاحرار مؤتمرو اللي فالحقيقة غير باش ربحو الوقت وشكلي وصافي. بدات المفاوضات بدا الحزب اللي ما جاب والو كيفرض على بنكيران يدير اش بغى. دابا سالينا من هاد الفيلم وهاد الشي دابا اعتبرها عبد العزيز افتاتي القيادي في العدالة والتنمية البارح فتصريحو ل"كود" "استهداف للحزب ومحاولة لتقسيمه". محلل قال ل"كود" "ظاهريا وهاد الشي مهم راه الملك احتارم الدستور وعين شخص اخر من نفس الحزب. المصدر اضاف ل"كود" "بيان الديوان الملكي رسالة مفتوحة للحزب، مفادها. دابا سيرو ديرو شغالكم يا عدالة وتنمية. تفاهمو" وهاد الشي علاش كاينة عبارة غادي يتم الاعلان عن الشخصية اللي غادية تعين بتشكيل رئاسة الحكومة. محلل اخر ذهب في الاتجاه نفسه وقال ل"كود" بوضوح "القصر اللي موازين القوى فصالحو واضح. قبلتو مرحبا رفضتو شغلكم" حقاش هو اللي متمكن. ثم اضاف ل"كود" "العدالة والتنمية حاصل. اكيد بنكيران غادي يدعم ترشيح بحال الرميد او العثماني وغادي يساندو. حقاش عارف انه ايلى فشل غادية العلاقة بين القصر والحزب تتوثر كيف كانت بعد 2003 اي بعد الاحداث الارهابية ويمكن اكثر ويمكن ترجع لسنوات كثيرة. ما عندهمش خيارات كثيرة" هاد الخيارات غادي يتحسم فيها اليوم فاجتماع الامانة العامة للحزب.
