عرفات "كود" من مصادر مطلعة أن المغرب كيستعد باش يرجع المغاربة اللي حاصلين جنوباسبانيا، وتحديدا فمنطقة مالاكَا، اليوم الأربعاء، بزاف منهم وصلوهم اتصالات هذ الصباح باش يوجدو راسهوم لرحلة كاينة مع 16:00، غايجيو فيها 300 ف3 ديال الطيارات التابعين للخطوط الملكية المغربية، وغادي ينزلو فمطار تطوان. وفتواصل مغاربة مالكَا مع القنصلية المغربية تماك، شرطات عليهم باش يجيو طوال ومايجيبوش معاهم طوموبيلاتهم، وهذشي اللي خلف استنكار كبير وسطهم، خصوصا وأن أغلبيتهم عندهم الطوموبيلات، وماعارفينش فين يحطوهم، بزاف منهم كانو طلبو القنصلية باش يرجعو فرحلات بحرية، لكن القنصلية ما عليها والو. والقنصلية كتسبق الناس اللي فوضعية هشة، والمغربيات العاملات فحقول الفريز، والناس اللي خلاو ولادهم صغار بوحدهم فالمغرب، واللي قربات تتسالا ليهم الفيزا، بينما قالت لصحاب الفيزا اللي عندهم فيها مدة طويلة، واللي ماكانوش مقطعين باش يرجعو للمغرب، بللي مازال خاصهم يتسناو حتى يبان شي قرار جديد. بالنسبة لباقي مغاربة اسبانيا، فكاين احتمال كبير يرجعو غدا، بحيث السفارة اتصلات بيهم وخبراتهم باش يجمعو حوايجهم ويوجدو راسهم لرحلة قريب غتكون. ولبارح ناصر بوريطة، وزير الشؤون الخارجية والتعاون الإفريقي والمغاربة المقيمين بالخارج، كشف بللي المغرب غيرجع المواطنين ديالو اللي حاصلين فسبانيا فهذ 48 ساعة، من بعد غادي يجي الدور على اللي حاصلين فتركيا وفرانسا ودول الخليج والدول الإفريقية.
