عام 1966، زار المغني البريطاني Graham Nash المغرب، وكان شد التران من كازا لمراكش، وتماك كتب أغنية عليها، وكانت سبب باش عاد زاد تشهر فستيل الوودستوك فالسبعينيات. هذيك الرحلة كانت بالنسبة لناش زوينة بزاف، وكافية باش يكتب أغنية بوب لمدة 3 دقائق، ناش، اللي كان المغني الرئيسي ففرقة البوب البريطانية The Hollies فالستينات، كان واحد من الفنانين والمشاهير الأجانب اللي كيشوفو فالمغرب مرحلة أساسية لموجة الHippie. خلال هذ الرحلة، اللي دارها ناش فاش خدا عطلة من خدمتو كرئيس لThe Hollies، كتب "مراكش إكسبريس" اللي قال فيها النقاد أنها حددات عصر موسيقى الHippie فالستينات، وفمضمونها، كانت كتوصف الأغنية كيفاش كانت هذ الرحلة فالتران من كازا لمراكش. بحال بزاف ديال فرق الروك، بحال Rolling Stones وLed Zeppelin، ومجموعة من الكتاب من جيل الBeat، سافر كَراهام ناش للمغرب، وقال على المرحلة اللي دوزها تماك، وخصوصا على الرحلة: "كنت فالبروميير كلاس، وكانو بزاف ديال العيالات الميريكانيات الكبيرات فالعمر والمرفحات، وكانو كاملين صابغين شعرفهم بالزرق"، لكن هذ الكلاس ماناسباتوش، "حسيت بالقنط ورجعت للتروازيام كلاس، وبانولي ناس كيطيبو ماكلة فشيشكل على بوطات صغار ديال الخشب، وكانت ديك البلاصة عامرة بالدجاج والخنازير والماعز، كان كلشي تماك زوين"، كيف قال ناش. الأغنية شملات هذ الجو، وشعور كَراهام ناش وسط التران، اللي قال، فوصفو لعملو: "الأغنية هي حرفيا آشنو وقع لي". وفالوقت اللي كان كيظن فيه ناش أن الأغنية ديالو، المكتوبة فالمغرب، غادي تعجب فرقتو فالنكَليز، لكن مابغاوهاش، وشافوها ماشي تجارية بدرجة كافية، وهذشي خلا ناش يعاود النظر فالعضوية ديالو فالمجموعة، قال على هذشي "إه، كان واضح أن مسيرتي المهنية مع The Hollies غتسالي". وهذشي بالضبط اللي وقع من بعد، مشا الكومبوزيتور البريطاني للوس أنجلوس فميريكان، باش يقلب على مسيقيين خرين، اللي يقدرو كتابتو وموهبتو، ونضم فاللخر للمغنيين وكتاب الأغاني David Crosby و Stephen Stills، ومن بعد اسسو مجموعة الفولك روك CSN، نسبة للحروف الأولى من كنياتهم. مع هذ الجوج، رجع ناش أغنيتو المراكشية، اللي سجلها ففبراير 1969، وخرجات أخيرا فماي من نفس العام، بعنوان "مراكش إكسبريس"، وكانت جزء من الألبوم الأول للمجموعة. وقال Louder Sound على هذ لأغنية: "كَيتار ستيلز كيعاود صدى رحلة التران ديال ناش، وكيخليك الأغنية كلها تولي تفاؤل، كاين عدد قليل من الكلمات العبثية، قبل ما يبدى ناش فالغنى، بنغمات كلها دفء..." وعلى عكس اللي اعتقدوه The Hollies، وصلات الأغنية للمراكز الثلاثين اللولة فقائمة US Billboard، وجات فالمركز 17 ضمن 20 أغنية فالمملكة المتحدة، وكانت الأغنية الوحيدة اللي حققات بحال هذ النجاح عند المجموعة. وصرح ناش: "كانت الأغنية كتضحك فاش كتبتها... هي ماشي أحسن أغنية فالعالم لكن الناس مازال كتعجبهم فكل مرة غنيناها فاللايف..." https://www.yabiladi.com/articles/details/68201/marrakech-express-l-histoire-d-une-chanson.html
