اش واقع في المحمدية ؟؟ هاذ السؤال كيطرحو كل كبير وصغير بالمحمدية بل حتى الناس المهاجرين تاع المحمدية في الخارج ..اش واقع ..اش واقع ؟؟ اللي واقع واللي كيتشاف ويتسمع ويتقال ..حملة السلطات بالمحمدية تاع ماكتسميه : تحرير الملك العمومي، جميل ، طيب هاذ الملك العمومي بَان للمسؤولين بالمحمدية ع داب وكِيف ماكيقولو التجار وعدد كبير من المواطنين ع ملي جات السيدة العاملة للمحمدية ومن بعد عشر شهر من توليها هاذ المنصب : سؤال كيتطرح بالحاح ؟ وسؤال اخر : فين كانت السيدة العاملة هاذي عشر شهر ؟ اش دار للمدينة ؟ اش كان البرنامج التنموي ديالها للمدينة وسكان لمدينة ؟ اذن عدد كبير من الناس هنا بالمحمدية كانو ضد هاذ الحملة خصوصا انها غير منصفة كيف ماكيقولو التجار والمواطنين : العاملة كون كانت فعلا باغا تحرر الملك العمومي تبدا بيه بالروس لكبيرة اولا وهي عارفاهم وكطل عليهم من نافذة مكتبها بالعمالة وحدا لبحر..هاذوك التجار تما - كيقولو المتضررين والمواطنين - شكون هاذوك ناس فوق القانون ، مواطنين من الدرجة لولا واللي في الجوطية وزنقة السقاية والجزائر من الدرجة اللي ماعندها رقم..
اذن هاذ الحملة اللي كل واحد من المتضررين والمواطنين اش سماها : "شطط في السلطة ، ملي تحرجات هاذي عشر شهر ومادارت والو للمدينة ناضت حكا للملك العمومي" ، وكاين اللي قال: " كون فعلا العاملة كانت باغا تخدم تحل مشكل السكن تاع البرادعة والمسيرة..او حتى تستقبلهم على الاقل..."" كلام كثير كيتقال في المدينة..في الاحتجاجات تاع هاذ الاثنين تاجر كان غ يحرق راسو..، إوا فين وصلنا بهاذ لمدينة..؟ كون حرق راسو ، والحريق تاع راسو راه كيتزامن بتاريخ هام بالحريق وبالربيع العربي اللي هو اليوم 17 ديسمبر تاريخ اللي حرق فيه البوعزيزي راسو فسيدي بوزيد واللي ندالعت بسبابو الثورة، اوا حنا ماكنتمناوش هاذ شي لبلادنا لعزيزة ، المغاربة واعيين يحبو وطنهم واهاليهم وملكهم ومتشبتين بالدولة العلوية الشريفة مهما تكون الاسباب والدليل على ذلك هو مهما كيتعرضو من بطش وظلم وقهر من طرف السلطات تاع المسؤولين تاع مدينتهم دايما كتسمع : "عاش الملك ..عاش الملك" ، الملك اللي لللاسف ماكيوصلوش هاذ شي وطبعا مايمكنش ليه ربما يعرف كلشي ..لكلام كتير وسكات حسن. نتلاقاو غدا في موضوع جديد في فقرة "جوج كلمات"..
اللي فاتو حلقة الامس يضغط هنا واللي كان عنوانها : الله يعطنا وجهك
