#بالمغربية_تاعرابت: مفتاح « كيحل » لوجورنال !

داكشي اللي كتب نور الدين مفتاح مدير الجورنان ديال « الأيام » على مرحلة « لوجورنال » و »الصحيفة » مهم بزاف للناس اللي كيهتمو بحياة الصحافة فالمغرب.
علاش مهم؟
حيت مجموعة ديال الأكاذيب كتقال بخصوص هاد المرحلة، كيرددوها مجموعة ديال الناس اللي ماعارفين والو، وغير معاودين ليهم واللي من فرط الترديد ديالها ولات بحال الحقائق.
أهم هاد الأكاذيب: الصحافة فالمغرب بدات مع بوبكر الجامعي وتسالات وسدات البيبان وهبطات الريدوات مع بوبكر الجامعي.
يعني الرواد اللي كانوا قبل مايتزاد هاد السيد ماعندهم حتى قيمة، ثم الأجيال اللي جات موراه من الصحافيين ماعندها حتى قيمة.
شهادة مفتاح من قلب الدار، يعني ديال واحد كان شاهد على بزاف ديال الأمور، منها اللي يصلاح يتقال دابا، ومنها اللي يقدر يتسنا شوية، مافيها باس.
أهم هاد الأمور أن بوبكر ومن معه ماكانوش باغيين يديرو الصحافة أصلا. هوما كانوا عندهم طموحات سياسية، وكانوا باغيين يكون عندهم دور معين فبداية الألفينات والصحافة الزغيبية المسيكينة المظلومة كيف ديما كانت مجرد حيط قصير طلعو فوق منو، بحال اللي طلع فوق عدد آخر كبير موراهم باش يحقق أهداف سياسية وحزبية ماعندها حتى علاقة بمهنة الصحافة
مفتاح رمى بحجرة كبيرة فالكلتة أو الضاية ديال ديك التجربة، وبزاف ديال الأمور المهمة اللي قالها تصلاح بداية لصحافيين الاستقصاء يلا عندنا هاد النوع ديال الصحافة باش ينقبوا فيها ويخرجو من التنقيب ديالهم بمواد صحافية حقيقية كتكشف بقية المستور اللي بزاف ديال الناس ماشي من مصلحتهم أنه يتكشف
فانتظار العثور على هاد الصحافيين الاستقصائيين مساكن، التنويه ضروري بالرد ديال مفتاح على بوبكر، حيت هو رد من قلب الدار خارج أولا، وحيت حطم ثانيا أو بدا عملية التحطيم ديال أكاذيب كبيرة كيرددوها ناس ماعارفين الو، وغير معاودين ليهم. وثالثا وهذا هو الأهم حيت كيحل عينينا كاملين على شنو خصنا نتفاداو، يلا بغينا ننجحو تجربة صحفية فالمغرب اليوما بعيدا عن الأطماع القبلية والعائلية والسياسية والحزبية الضويقة بزاف اللي ماعمرها بغات تهنينا فهاد البلاد السعيدة، واللي هي سباب الحالة اللي حنا فيها بلا زيادة وبل نقصان...