الشفوي.. الله يداوي!

دَرَّجْ... دَرَّج
هَرَّج... هَرَّج
كلشي يتفرج..
ودير حلقة
من كلام
بريح لَنْفاس مْعَلْقه..
واللّي تدرج يهزو الريح..
بشفاه الشفوي
مْسوْقَة..
الدارجة خدامة تقضي لغراض
اعطيني خبزة
بشحال مطيشة؟
لبسة الخدمة ما تكون مزوقة..
الدارجة لغة العمل..
ولغة العمل ديما نْدية بْعَرْقَا
والفصحى لغة الفكر
عْقِلْها وتَوَكَّل..
تفكر.. تتأمل.. تم هي تغوص..
تم.. هي غَرْقَا..
الدارجة خدامة..
والفصحى مولات الدار..
ما تنساها فسفر..
وإلى مشيتي للخدمة..
فيها تفكر..
بها تحلم.. بها تشعر..
هي تروق ليك وترقيك..
وأنت بها ترقى..
الفصحى تتجمل.. ما تنساك
ما تنسى راسها..
تفكر فيك.. وتفكر فراسها..
جميلة ومأنقة..
عادية واللا بالماكياج مزوقة..
الفصحى ديما مألقة..
الدارجة ما تفكر فناسها..
ما تفكر فراسها..
ما يفكرو فيها ناسها..
وكن كانت الدارجة تفكر
فراسها.
كن سمَّت راسها..
الدارجة سميت فصحى
قحة حقٍّا..
لهجة صبية
ماجاها من الشهر حقا..
ما جامعة راسها..
ما مفرقة..
ما مزوجة ما مطلقة..
غير مطلوقة شفوي
فالريح معلقة
إلى تقيدات تقطع القيود
وإلى تعقدات غير ملحون
وكلام موزون..
بالهوى نَطقَا..
اهدر بالدارجة..
وفكر بالفصحى..
تفكر بالدارجة ما
تنبت فكرة..
غير هدير الوقت..
وهدير الهدرة..
... وسبحان اللي وزرع لرزاق..
واعطى لكل لغة.. لكل لهجة رزقا..
لهجة تنفع للعمل..
ولغة تصنع الفكرة.
هكا صرف الله المكتوب..
وهكا نصرفو الشفوي..
واللي مصرفة..
واللي ما تتصرف..
كلها مْقَدَّرة..
هكا اللغات واللهجات مرافقه..
وهكا تتعيش ياعيوش..
ولاش باغي تْخربقا!