تذاكر المحمدية والرجاء بقاو منشورين والكيشييات كيتشمشو بسبب مقاطعة الرجاويين

بقاو تذاكر ماتش شباب المحمدية والرجاء الرياضي برسم ربع نهائي كأس العرش اللي غيتلعب بين الفريقين اليوم السبت بتيران البشير، منشورين فالكيشيات وما مسوق لهم حد وهذا الشي بسبب أثمنتها.
وبدأت عملية بيع تذاكر ماتش شباب المحمدية والرجاء اليوم السبت مع 9 الصباح بشبابيك تيران البشير بالمحمدية وغتسالي مع 9 الليل، وخلال النصف الأول من اليوم كاين عزوف كبير للجماهير سوا الرجاوية أو د الشباب على شراء التذاكر، وهذا الشي كيجي بعد الحملة اللي طلقتها "الكورفا سود" ضد هشام آيت منا رئيس شركة شباب المحمدية بمقاطعة الماتش حيث زاد في نظرهم على الجماهير في أثمنة التذاكر بشكل مبالغ فيه.
ليتيكي فليكيشي ديال تيران البشير منشورين والخدامة بالشبابيك غير كيتشمشو وهذا أمر غير طبيعي وغير مسبوق خلال عملية بيع تذاكر ماتش شباب المحمدية والرجاء الرياضي وكان ديما على هذا الماتش الطلب والنفاذ، ولكن الاثمنة اللي تحددات في 200 درهم للمنطقة المكشوفة، و 300 درهم للمنصة المغطاة، و 2000 درهم للمنصة الشرفية، خلات الجماهير زعفانة وتفرج فالماتش فالتلفازة.