فوت ميركاتو: أمرابط اتفق مع أتلتيكو مدريد والأخير ما عندوش لفلوس والأهلي السعودي كيطمع فيورنتينا

كشفت أخر التقارير الأوربية أن مستقبل الدولي المغربي سفيان أمرابط لاعب فيورنتينا الإيطالي، معقد ومازال ما معروفش فين غيعطي الراس خلال هذا الميركاتو الصيفي.
وحسب موقع "FOOTMERCATO" الفرنسي، فبعدما خواو البارصا بسفيان أمرابط اللي كيتعتبر أحسن لاعب إرتكاز حاليا فالعالم، كيبقى أتلتيكو مدريد الإسباني هو الخيار المفضل عند الكلادياتور المغربي، اللي كان باغي يدير المستحيل باش يلعب مع البارصا ولكن ما كتابش لعدد من الأسباب من بينها فشل صفقة عودة الأرجنتيني ليونيل ميسي إلى الفريق الإسباني، حيث كانوا البرصاويين معولين على أمرابط يهز لحمل فالظهر ديال ميسي.
نفس المصدر، كشف بلي كاين اتفاق بين سفيان أمرابط مول 26 عام مع أتلتيكو مدريد، ولكن الفريق الإسباني ما قادرش يلبي المطالب المالية ديال فيورنتينا الإيطالي فريق النجم المغربي، مع العلم أن فيورنتينا كان عندو دور حسام فإفشال صفقة انتقال أمرابط إلى البارصا فالميركاتو الشتوية الماضي بسبب المطالب المالية.
وحسب نفس الموقع، فالمطالب المالية ديال فيورنتينا اللي معقدة الأمور للفرق الأوربية فصفقة سفيان أمرابط، مشجعة الأهلي السعودي اللي قدم عرض عن طريق نور الدين أمرابط الاخ الكبير لسفيان واللي فايت لعب مع النصر، ولكن أمرابط الصغير باغي يبقى يلعب فأوروبا.