فيورنتينا الإيطالي باغي يربح ثمن كبير من ورا سفيان أمرابط ويستغل منافسة النكالزة عليه

كيحاول فيورنتينا الإيطالي استغلال القيمة الكبيرة اللي صبح كيتمتع بها الدولي المغربي سفيان أمرابط فسوق انتقالات اللاعبين بأوروبا باش يدخل أكبر مبلغ مالي من صفقة انتقال اللاعب من الصفوف ديالو إلى فريق كبير، خصوصا وأن الفرق اللي كتجري ورا أمرابط باش تسني معه كبيرة فحال ليفربول وتوتنهام من النكليز.
وحسب جريدة "كورييري ديلو سبورت" الإيطالية فرئيس فيورنتينا روكو كوميسو باغي يدخل فلوس صحيحة من الصفقة، حيث عارف القيمة ديال سفيان أمرابط، وكيشترط مبلغ 50 مليون يورو باش يتنازل على الخدمات ديالو فالميركاتو الشتوية المقبل، والأكثر من هذا باغي يجدد العقد مع اللاعب المغربي باش يضمن أن الصفقة ما تنزلش على هذا الثمن.
ومن المنتظر يسالي اليوم الأحد سفيان أمرابط العطلة ديالو ويلتحق بنادي فيورنتينا الفريق ديالو، فانتظار شنو غادي يكون فالأيام المقبلة، خصوصا وأن الانتقالات الشتوية على الأبواب، وبزاف من المتتبعين كيرشحو انتقال سفيان أمرابط من الفريق الإيطالي إلى النكليز والصفقة ملعوبة ما بين ليفربول وتوتنهام.