قطع المغرب الطريق المغرب من خلال الجامعة الملكية المغربية لكرة القدم الطريقة على القطريين، والمحاولات ديالهم لخطف الموهبة المغربية إلياس حسني النجم السابق اللي انتقل من باريس سان جيرمان الفرنسي النادي اللي ماليه قطريين إلى السد القطري فالميركاتو الصيفي، فانتقال غريب عجيب وكلشي المتتبعين للكورة العالمية شمو فيه ريحة التجنيس القطري. وكشف الناخب الوطني عصام الشرعي مدرب المنتخب الوطني المغربي الأولمبي لكرة القدم، على لاليست ديال ليكيب ناسيونال استعدال لمواجهة كل من المريكان والدنمارك فجوج ماتشات وديين تحضيرا لاولمبياد باريس 2024، وكتكون اللائحة من 26 لاعب ومن بين هذه العناصر كاين النجم الصاعد إلياس حسني اللي كلشي كيشوف ان عندو مستقبل كبير. وهكذا كيكون المغرب قطع الطريق على القطريين والأطماع ديالهم فاللاعب المغربي إلياس حسني مول 18 عام، واللي كان داخل ضمن مخطط قطر لاستقطاب المواهب المغربي الممارسة فأوروبا لعندها، وتوجدهم باش تجنسهم فالمستقبل وتقاد منتخب قطري تلعب به فالاعوام اللي جاية وهذا الشي كان كشف عليه "كود" قبل أشهر، زاد تأكد من خلال تعاقد السد القطري مع اللاعب إلياس حسني لاعب باريس سان جيرمان الفرنسي، اللي عندو دوبل ناسيوناليطي مغربية فرنسية. وكان السد القطري فالميركاتو الصيفي الماضي علن على انتقال إلياس حسني لعندو من باريس سان جيرمان الفرنسي مع العلم ان الأخير هو نادي ماليه قطريين غير كيلعب ففرنسا، فصفقة غيلعب بالموجب ديالها حسني مع السد موسم 2023-2024، واكتفى الفريق القطري غير بهاد شي من المعلومات وبدون ما يوضح شي حاجة اخرى على الصفقة. وراه كيستهدف الاتحاد القطري لكرة القدم اللاعبين مغاربة الاصل صغار السن اللي عندهم جنسيات مزدوجة الممارسين بالبطولات الاوروبية المعروفة بالتكوين بحال فرنساهولندا وبلجيكا، وإلياس حسني لاعب باريس سان جيرمان الفرنسي غير مثال واحد من بزاف، حيث القطريين مدة هادي وهما كيخططو وخدامين فاستقطاب المواهب المغربية الممارسة بأوروبا، باش يبنيو منتخب قطري للمستقبل بأرجل مغربية. و خلال الاشهر الماضية دارت الأندية القطرية بدعم من الإتحاد القطري لكرة القدم عدد من الصفقات، ديال لاعبين من أصول مغربية ممارسين بأوروبا تحت غطاء تشبيب البطولة القطرية، ومن بين هاد اللاعبين محمد التعبوني اللي سنا مع النادي العربي وجابوه من فاينورد الهولندي، ونادي المريخية اللي جاب نوفل بنيس وحتى هو من فاينورد الهولندي، وكذلك كاينين لاعبين مغاربة الأصل عندهم دوبل ناسيوناليتي مازالين صغار فالسن ما بين 18 و21 عام، ممارسين فبطولات أوروبية بحال فرنسا وبلجيكا، ناوية الأندية القطرية باش تستقطبهم.