القطريين غير زايدين فيه.. السد القطري خذاو الموهبة المغربية إلياس حسني من PSG باش يلعب معهم.. واش باغيين يجنسوه لمنتخبهم ؟

كتواصل قطر الجري ورا استقطاب المواهب المغربية الممارسة فأوروبا لعندها، وتوجدهم باش تجنسهم فالمستقبل وتقاد منتخب قطري تلعب به فالاعوام اللي جاية وهذا الشي كان كشف عليه "كود" قبل أسابيع، وهاو كيزيد يتأكد من خلال تعاقد السد القطري مع اللاعب إلياس حسني لاعب باريس سان جيرمان الفرنسي، اللي عندو دوبل ناسيوناليطي مغربية فرنسية.
وعلن السد القطري يوم الاثنين بليل، أن المهاجم الشاب إلياس حسني مول 18 عام اللي من أصول مغربية وجنسية فرنسية، انتقل لعندو من باريس سان جيرمان الفرنسي مع العلم ان الاخير ماليه قطريين غير كيلعب ففرنسا، فصفقة غيلعب بالموجب ديالها حسني مع السد موسم 2023-2024، واكتفى الفريق القطري غير بهاد شي من المعلومات وبدون ما يوضح شي حاجة اخرى على الصفقة.
الاتحاد القطري لكرة القدم كيستهدف اللاعبين مغاربة الاصل صغار السن اللي عندهم جنسيات مزدوجة الممارسين بالبطولات الاوروبية المعروفة بالتكوين بحال فرنسا هولندا وبلجيكا، وإلياس حسني لاعب باريس سان جيرمان الفرنسي غير مثال واحد من بزاف، حيث القطريين مدة هادي وهما كيخططو وخدامين فاستقطاب المواهب المغربية الممارسة بأوروبا، باش يبنيو منتخب قطري للمستقبل بأرجل مغربية.
خلال الاشهر الماضية دارت الأندية القطرية بدعم من الإتحاد القطري لكرة القدم عدد من الصفقات، ديال لاعبين من أصول مغربية ممارسة بأوروبا تحت غطاء تشبيب البطولة القطرية، ومن بين هاد اللاعبين محمد التعبوني اللي سنا مع النادي العربي وجابوه من فاينورد الهولندي، ونادي المريخية اللي جاب نوفل بنيس وحتى هو من فاينورد الهولندي، وكذلك كاينين لاعبين مغاربة الأصل عندهم دوبل ناسيوناليتي مازالين صغار فالسن ما بين 18 و21 عام، ممارسين فبطولات أوروبية بحال فرنسا وبلجيكا، ناوية الأندية القطرية باش تستقطبهم.