ماتش الوداد ولاسيك ملعوب بكيشي فيرمي ومدرب ميموزا: الوداد جايين لأبيدجان باش يربحونا وها باش غنغلبوهم

اكد الفرنسي جوليان شوفاليي مدرب أسيك ميموزا الايفواري ان الماتش ضد الوداد الرياضي غدا السبت فأبيدجان، ضمن الجولة 2 من دور مجموعات دوري أبطال افريقيا، غيكون صعيب حيث الواك جايين يربحو، ولكن الفريق الايفواري عندو امكانيات باش يتغلب عليهم.
وتحدث مدرب أسيك ميموزا خلال الندوة الصحافية اللي كتسبق ماتش الوداد الرياضي وقال: "الوداد غيبغيو يربحو حيث خسرو 3 بوان فتيرانهم الماتش اللي فات، وكنتسناو هذا الماتش باش نشوفو النيفو ديالنا مع خصم قوي بامكانيات كبيرة بحال الوداد".
ووضح مدرب لاسيك وقال: "معولين على العمل الجماعي ديال لكروب باش نبلوكيو الوداد، والتعاون ديال اللاعبين مهم باش نصعبو عليهم الماتش وحتى الكونديسيون فيزيك ديالنا والكوطي تيكنيك".
وديما مع ماتش الوداد الرياضي واسيك ميموزا الإيفواري، فالاخير علن ان تذاكر المباراة سالاو، الشي اللي كيعني ان تيران فيليكس بوانيي غيكون عامر فالمواجهة بين الفريق بالمشجعين ديال ميموزا اللي غيساندو فريقهم.