الركراكي: أشنو غيطرا إذا ما ربحناش كوب دافريك فالكوت ديفوار ؟

حاول الناخب الوطني وليد الركراكي يحيد الضغط عليه وعلى لاعبين المنتخب الوطني المغربي المشارك فكاس أفريقيا 2023 فالكوت ديفوار، حيث ولاو كلشي المتتبعين كيرشحوه باش يربح البطولة بعد آخر جيل اللي كان توج بها قبل 48 عام، واكد ان انجاز الأسود فمونديال 2022 ما كافيش بوحدو للتتويج بكوب دافريك.
وتحدث الناخب الوطني وليد الركراكي خلال الندوة الصحافية اليوم الخميس اللي اعلن فيها على ال 27 لاعب المشاركين فكوب دافريك وقال: "بالنسبة للضغط، أنا كنت مشجع قبل ما نلعب فالمنتخب المغربي وكنت لعاب فيها وبعد كنت مساعد مدرب، والضغط كان ديما على المنتخب المغربي فلاكوب دافريك وكنا ديما كنمشيو باش نديوها وكنتسناو كاملين نديوها من 1976، ما تبدلت حتى حاجة فهادشي من غير الا الناس كيصحابهم بلي غنديو الكاس حيث حنا الرابعين فالمونديال وهذا الشي ماشي بصح حيث حتى أجيال قبل منا كانوا فالمستوى ديالهم وما جابوش لاكوب، وعلاش غنديرو على هذا الجيل ضغط كبر من اللي الضغط اللي عليهم".
وكمل الناخب الوطني وقال: "اللاعبين ديما كيبغيو يفرحو الشعب ويديو الالقاب وغنمشيو باش نلعبو الكورة ديالنا ونعطيو اللي فجهدنا والضغط كنحلو أنا لإيجابي وهذا اللشي اللي كنوصلو للاعبين والجمهور ديالنا وهادي اول بطولة غنشاركو فيها بعد كوب ديموند اللي وصلنا فيها للدومي فينال، وآخر كوب دافريك وصلنا فيها لربع النهائي و 20 عام عادي ما وصلنا للدومي فينال ومن 76 ما ربحناها، واذا ما ديناهاش شنو غيطرا؟؟.. غتدوز عامين ونلعبوها فبلادنا ونديوها، والمهم دابا نمشيو بالثقة ونديرو الاستعدادات ديالنا باش نحيدو هاد سوء الحظ ديالنا من كوب دافريك وهذا هو التحدي اللي عندنا باش نكون ليكيب اللي غيربح البطولة من بعد 48 عام".