الركراكي: ها المشكل ديالنا فكوب دافريك.. وراه ما شي حيث وصلنا لدومي فينال فالمونديال راه غنربحو كأس إفريقيا

أكد الناخب الوطني وليد الركراكي أن المنتخب المغربي عندو مشكل فكأس إفريقيا، وراه ماشي حيث وصل لدومي فينال كاس العالم 2022، صافي كيعني أنه غيربح كأس إفريقيا 2023 اللي غتلعب بالكوت ديفوار عام 2024.
ووضح وليد الركراكي خلال الندوة الصحافية اليوم الخميس بمركز محمد السادس بالمعمورة وقال: "ماشي حيث درنا دومي فينال فكوب ديموند غنديرو الضغط علينا وخاصنا نديو كوب دافريك، أنا ما متافقش مع هذا الشي".
وكمل الركراكي: "بيان سير كنحلمو كنيدرو كوب دافريك مزيانة ونفرحو المغاربة ولكن الحقيقة هي أن آخر دومي فينال لعب المنتخب المغربي هي اللي لعبت أنا ويمكن ولدي كان عندو عام، إيوا هادي 20 عام ما شفنا الدومي فينال فلاكوب دافريك".
وفسر الناخب الوطني مشاكل المنتخب المغربي فكأس إفريقيا وقال: "راه دازو لاعبين كبار ومدربين اللي ربحو كوب دافريك من قبل ولكن ما وصلوش للدومي فينال مع المنتخب المغربي والمشكل ماشي تقني أو تكتيكي راه المشكل بسيكولوجي، حنا بغينا نديوها ولكن عندنا أهداف نوصلو للدومي فينال شحال من مرة باش هاد ليكيب تولف هاد الأدور ونقدر نربحو كوب دافريك، ولكن باش نجيو نديرو الضغط على المنتخب المغربي لا، الحقيقة هي أن كوب دافريك غتكون صعيبة والهدف نكون مع 4 أحسن منتخبات إفريقية"