الرجاء حلو مشكل التسجيل: النسور ضربو طنجة بسداسية وخداو الصدارة فماتش حيح فيه الزرهوني وبوزوق

حقق فريق الرجاء الرياضي رباح مهم على اتحاد طنجة اليوم الخميس فتيران برشيد، برسم الدورة 13 من البطولة الاحترافية لكرة القدم، بالأداء والنتيجة الكبيرة وطلعت الخضرا للصدارة.
وحسمو الرجاء الرياضي الماتش ضد اتحاد طنجة وربحوهم بنتيجة 6 لواحد، وسالا الشوط الاول بنتيجة 3 لزيرو وزادوهم فالشوط الثاني 3 اهداف آخرى، وماركا للخضرا كل من نوفل الزرهوني هاتريك ويسري بوزوق هاتريك.
وقدرو الرجاء يفتاتحو التسجيل بواسطة نوفل الزرهوني بكري بهدف فالدقيقة 3 من الماتش، وزاد يسري بوزوق الهدف الثاني فالدقيقة 16 من ضربة جزاء، ورجع نفس اللاعب ماركا الهدف الثالث فالدقيقة 28، وفالدقيقة 62 سجل نوفل الزرهوني الهدف الرابع للخضرا، ويسري بوزوق ضرب الهدف الخامس فالدقيقة 69، والهدف السادس ماركاه نوفل الزرهوني فالدقيقة 73، والهدف ديال اتحاد طنجة ماركاه لهم اسماعيل خافي فاللحظات الاخيرة.
وبهذا الرباح خداو الرجاء الرياضي صدارة البطولة الاحترافية بشكل موقت برصيد 27 نقطة بفارق نقطة وحدة على الجيش الملكي اللي عندو ماتش غدا الجمعة مع السوالم، اما اتحاد طنجة زادو غرقو والفريق كيحتل المركز 14 برصيد 10 النقاط.
وديما مع البطولة عن نفس الدورة ونفس التوقيت تعادلو الفتح الرياضي مع يوسفية برشيد بنتيجة واحد لواحد فتيران مولاي الحسن فالرباط، وكل فريق خدا نقطة واحدة، والفتح ولات عندهم 21 نقطة وكيحتلو المركز ال5، وبرشيد كيحتلو المركز قبل الأخير برصيد 9 النقاط.