سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
المغاربة عيالات ورجال خلاو شقا وكسوة العيد وجار يشجعو اللبؤات باش يتأهلو لأولمبياد باريس فرسالة قوية للرجعيين وكيأكدو انهم باغيين المساواة بين المرأة والرجل
بزاف من الجماهير المغربية خلات الشقا ديال عيد الفطر اللي غيكون فالمغرب غدا الاربعاء والترتيبات ديالو من كسوة العيد وشراء الحلوة وتحضيرها وغيرها، وجاو يشجعو المنتخب المغربي النسوي فتيران مولاي الحسن فالرباط، اللي لاعب اليوم الثلاثاء ضد منتخب زامبيا الدور الرابع والاخير من الاقصائيات المؤهلة إلى أولمبياد باريس 2024. الجماهير المغربية عيالات ورجال بنات ودرار، صغار وكبار، الشباب والشيبانيين، بداو كيأمنو وكيفهمو ثقافة المساواة بين العيالات والرجال فالمجتمع المغربي، وفكل مناسبة رياضية نسوية ولا كيتأكد هذا الشي بالحضور القوي ديال المشجعين المغاربة من الجنسين إناث وذكور لتشجيع المرأة المغربية على ممارسة الرياضة وهذا حقها بحالها بحال الرجل، وتحقيق الإنجازات بحالها بحال الرجل وأحسن إذا جاتها الفرصة. اليوم تيران مولاي الحسن فالرباط، عامر بالجمهور المغربي اللي جا يشجع المنتخب المغربي للسيدات ضد زامبيا، كيفما دارو قبل 2 سيمانات فأكادير ملي مشاو المشجعين المغاربة شجعو منتخب الرجال، وهذا الشي راه فيه رسائل مهمة على أن المرأة المغربية حتى هي وراها جمهور مغربي كيأمن بها فالمجال الرياضي، ورد قوي على شي رجعيين اللي باغيين يرجعو المجتمع المغربي من 2024 إلى القرون الوسطى ولاو يفتيو فالدين وهما ما قارين شريعة وعندهم سند قانوني والديبلوم ديالهم فوقية ولحية وشي آيات وشي أحاديث حتى حد ما عرف مدى الصحة ديالها وعاطينها للدجل والتجارة بإسم الدين وكيحرمو ويحللو اللي بغاو، خوفا من أن المرأة المغربية تبين التفوق ديالها، كيفما دارت فاطمة الفهرية والسيدة الحرة ونوال المتوكل ونزهة بيدوان وغزال الشباك وغيرهم من العيالات المغربيات اللي أكدو ان المرأة المغربية قادرة تتفوق وتنافس الرجل، ولكن هاد الرجعيين مازال بالأفكار ديالهم الرجعية كيقاومو التطور اللي كيعيشو المجتمع المغربي اللي كيتحرر شويا بشويا من هاد الأفكار الرجعية، والدليل مطالب ديال بزاف من المغاربة بتعديل مدونة الأسرة، وهو التعديل المرتقب يكون بتوجيهات من الملك محمد السادس. وبالرجوع للمنتخب الوطني المغربي النسوي، فاللبؤات دابا على أعتاب تحقيق انجاز تاريخي غير مسبوق فتاريخ الكورة النسوية، اللي كتعرف توهج كبير وتطور بالمجهودات ديال الجامعة الملكية المغربية والتوجيهات ديال الملك محمد السادس فتأكيد واضح على ان الاهتمام فالمغرب ومن أعلى سلطة هو اهتمام بگاع المغاربة من الجنسين عيالات ورجال، ودابا اللبؤات لاعبات باش يتأهلو لأولمبياد باريس 2024، بحالهم بحال منتخب الرجال اللي حتى هما تكاليفاو، باش يكون المغرب حاضر بعيالاتو ورجالو فأولمبياد باريس، فسابقة للكورة والرياضة المغربية والأفريقية والعربية.