عطيو التيساع للعيالات وخليوهم ياخذو حقوقهم بيديهم…

عبد اللطيف اكنوش -استاذ باحث في جامعة الحسن الاول بسطات ///
ما عرفتش علاش ما كاندافعش على المرأة وحقوقها…والله ما عرفت..مرة كا نقول أنني رجعي حتى النخاع…مرة كا نقول لأنني عندي عقلية ذكورية ورثتها من تربيتي في هاذ المجتمع ديال الويل…ومرات عديدة كا نقول: وأنا مالي كاع؟ آش مشى ليا؟ ياك عندي البنات، وبناتي ما كا نتدخلش فيهم وعاطيهم التيساع، وما حصل في يوم من الأيام أنني تدخلت في شؤون إحداهن، وأكتفي بالقيام بدور الوالد في تربيتهن على قيم المساواة بين بني البشر أولا، والمساواة بين الجنسين ثانيا، والابتعاد قدر المستطاع عن أمثالي من ذوي العقلية الذكورية والرجعية الموروثة من "الجهل المقدس"، بعيدا عن تفاهة التدين المليء بالرياء والتسيس الدنيء…

والله إيلى أنا رجعي وعندي عقلية ذكورية مريضة، وما كانتسوقش لهاذ الستون ديال المساواة بين الجنسين ولهاذ الستون ديال "حقوق المرأة"، وكنضحك بزاف على الرجال للي كا يقولو ليا كا يناضلو ما أجل حصول المرأة على جميع هذه الحقوق…كا نقول ديما لصحابي للي مسيطر عليهم هاذ الهاجس "آجي آخويا، بشحال كا يسوى العكر ديال العيالات؟ وبشحال كا يسوى السرينك وسوتيان كورج ديال العيالات؟ وبشحال كا يسواو القفاطن والجلالب والمضمات والصبابط ديال الطالون والصايات والطايورات ديال العيالات؟ وآشنو هي النفسية ديال السيدات ملي كا يكونو حاملات ولا داك شي للي على بالك ديال "حق الشهر"؟…كولهم صحابي كا يبقاو يدورو في عينيهم أمام الأسئلة للي كا نوضعها عليهم، وكا يعطيو حمارهم…
أنا هنا كا نفرح معا راسي وكا يعجبني راسي بزاف…كا نقول ليهم: "إيوا شفتو تاحراميات ديالكم، كيفاش باغي تناضل من أجل حقوق المرأة وانتا ما عارف على المرأة حتى وزة؟؟ شوفو أحزابكم السياسية…العيالات للي كا يوصلو للمناصب ديالكم لابد خصهوم يكونو خواتات القادة ديالكم، ولا أزواجهم، ولا صحاباتهم، ولا بناتهم ولا بنات عمهم، ولا شي قرينة كحلة للي تضربكم كاملين إن شاء الله….بل حتى العيالات اللي كا يحكمو في العيالات داخل هاذ العرمة ديال المؤسسات ما خارجات على هاذ القاعدة إلا من رحم ربك، وهوما قلالات بزاف وما بايناتش في الساحة…
ثم واش نتوما بنادم ولا حيوانات؟؟ كيفاش تديرو للمرأة "يوم واحد ديال المشماش" في السنة وكا تسميوه "عيد المرأة"؟؟ والأيام الأخرى آشنو هيا؟؟ أيام تامارى والقهرة؟؟؟

يوم واحد في الستة كا نسمعو فيه "اتحاد العمل النسائي" كا يغوت على "ضرورة إصدار قانون شامل لمناهضة العنف ضد النساء يضمن الزجر والوقاية والحماية والتكفل وعدم الإفلات من العقاب… وضرورة اعتماد مراجعة جذرية لمشروع القانون المتعلق بهيئة المناصفة ومحاربة كل أشكال التمييز"، وشي ستونات أخرى بحال هاذي، والحكومة ديال البلاد كا تسمع وكا تضحك وكا تقول: "خليوهم يدويو، نهار ديالهم عطيوه ليهم…"
وانا آسيدي خليني غير رجعي وذكوري وحيوان…خليني نحتارم المرأة غير من بعيد، وما نحشرش قمقومي في المشاكل ديالها…لأنه سوف يأتي يوم من الأيام لكي تنتزع حقوقها بنفسها ومن دون تدخل الذكور، سواء شئنا ذلك أم أبيناه، فتلك ضرورة تاريخية لا أحد بإمكانه الوقوف ضدها…