تذاكر ماتش المغرب وزامبيا غيتحطور للبيع.. واش الجمهور المغربي غيدير الفرزيات بين ولادو وبناتو ولا غتكون المساواة فالاحتفال بيهم ؟

حطات الجامعة الملكية المغربية لكرة القدم تذاكر الجوج ماتشات ديال المنتخب الوطني المغربي للعيالات امام زامبيا، للبيع ابتداء من غدا الاربعاء، غيكونو الماتشات فرصة للجماهير المغربية باش يتلقاو مع اللبؤات لاول مرة بعد الانجاز اللي داروه فكاس العالم 2023 فأستراليا، والوصول إلى ثمن النهائي لأول مرة فأول مشاركة للمغرب فالمسابقة العالمية.
السؤال اللي كيطرح نفسو دابا، هو كيفاش غتفاعل الجماهير المغربية مع هذه المناسبة، خصوصا وان الماتشات ديال المنتخب النسوي ملعوبين فجوج مدن فيهم شعبية كروية كبيرة هما الدار البيضاء والرباط والجمهور فيهم كيموت على الفوت وكيفهم فالجلدة مزيان، ولكن واش بالفعل جمهور الكرة غيدير المساواة وكيفما كيجري على تذاكر ماتشات المنتخب المغربي بعد مونديال قطر والانجاز التاريخي باش يشريهم ويتفرج فالأسود، غيجري لحضور ماتشات اللبؤات ويشري التيكي، وما يكونش عندو الفرق ما بين انجاز الرجل والمرا، هذا الشي اللي كلشي غيعرفو من خلال عدد الحضور الجماهيري فماتشات المنتخب النسوي الجايين، مع العلم أن منتخب الرجال كيلعب فتيرانات كبار بحال طنجة ومولاي عبد الله بالرباط اللي كيتصلحو دابا وأكادير اللي كان غيلعب فيه ماتش ليبيريا وتأجل بسبب زلزال الحوز، أما العيالات غيلعبو فتيران البيرجيكو وتيران مولاي الحسن، وهما بجوجهم الطاقة الاستعابية ديالهم صغيرة ومحدودة، ومن هنا كيبان ان المسؤولين ديال الجامعة عارفين ان الحضور الجماهيري فماتشات العيالات غيكون قل من الرجال ولو ان هذا ماشي مبرر.
والتحدي دابا هو ان الجماهير المغربية تبين العكس، وتأكد أن هذاك التفاعل الايجابي والدعم اللي رافق لاعبات المنتخب الوطني المغربي خلال مشاركتهم فمونديال استراليا ونيوزيلاندا، كاين حتى فالواقع وماشي غير فمواقع التواصل الاجتماعي، والهدف يكون التعبئة لحضور أكبر عدد ممكن من المغاربة فالماتشات بجوج ديال اللبؤات سوا فكازا او فالرباط ويتباعو كاع التذاكر علاش لا، باش لاعبات المنتخب المغربي يحسو بشوية ديال الاعتراف والتكريم من الجماهير المغربية، ويحسو بالمساواة بينهم وبين الرجال، واخا هذا الشي راه مازال خاصو الخدمة بزاف خصوصا من حيث الصورة النمطية اللي عند الجمهور على البنت اللي كتلعب الكرة.
غدا الاربعاء غيبداو تذاكر الماتشات بجوج الوديين د المنتخب المغربي للسيدات ضد زامبيا، وحددت الجامعة الملكية المغربية ثمن التذاكر فمبلغ 20 و 30 درهم، واللي بغا يسحب التيكي فكازا غيمشي لتيران الحاج نودير، وفالرباط من تيران مولاي الحسن، مع العلم ان الماتش الاول غيتلعب الجمعة الجاي فالبيرجيكو فكازا، والثاني فتيران مولاي الحسن فالرباط.