عبرو لاعبين المنتخب الوطني المغربي للفوتسال على الطموح ديالهم لتحقيق الرباح فالماتش الثاني من دور مجموعات كاس أفريقيا ضد منتخب غانا اليوم السبت، وطالبو الجمهور المغربي باش يجي يشجعهم فالماتش كيف دارو فالمباراة اللي فاتت. وتحدث كابيتان المنتخب المغربي للفوتسال ادريس الرايس الفني قبل ماتش غانا وقال: المنتخب الغاني خسر الماتش الاول، والمباراة ديالو ضدنا غتكون بالنسبة له مصيرية غيبغي يقدم فيها كلشي اللي عندو وما غتكون سهلة، وحنا مركزين باش نحققو الرباح الثاني على التوالي قدام الجمهور ديالنا وفالارض ديالنا وكنشكرو بزاف الجمهور المغربي لا اللي جاو ساندونا فالقاعة، ولا اللي كيتفرجو فينا من بعيد وراه ليميساج ديالهم كيوصلونا، وهما ديما قراب لينا ونتمناو انهم يزيدو يشجعونا، ويثيقو فينا كثر ويجيو يتفرجو فينا". وهضر عثمان بومزو لاعب المنتخب المغربي حتى هو على ماتش غانا وقال: "الماتش الجاي ضد غانا غندخلو فيه بتركيز عالي باش ما نطيحوش فنفش الأغلاط اللي درنا ضد منتخب انكولا، والماتش اللي فات نسيناه ومركزين غير على ماتش غانا باش نربحوهم ونرفعو رصيدنا إلى 6 النقاط".