عبرت مكونات المنتخب المغربي النسوي على الفرحة ديالها بعد الرباح المهم اللي حقق المنتخب اليوم الجمعة على المنتخب التونسي فتونس بنتيجة 2 لواحد، ضمن الدور الثالث من اقصائيات أولمبياد باريس 2024، واكدو انهم غيرجعو للمغرب باش يركزو على ماتش الروتور والتأهل للدور الرابع والأخير. وتحدث جورج فيلدا مدرب المنتخب المغربي للسيدات، وقال فتصريح للموقع الرسمي للجامعة: "قبل اي حاجة كنبغي نبارك للاعبات على الأداء ديالهم الزوين والتنافسية العالية فهاد الماتش، وواخا هاد النتيجة الإيجابية خاصنا التأكيد بالرباح فماتش الروتور الاربعاء الجاي". غزال الشباك لاعبة المنتخب المغربي حتى هضرت وقالت: "الحمد لله على الرباح وحنا فرحانين بزاف بالنظر للظروف اللي لعبنا فيها والتيران اللي لعبنا فيه كان صعيب ما قدرناش نلعبو بالطريقة ديالنا ولكن تعايشنا مع الظروف وقدنا نربحو ودابا درنا الخطوة الاولى ومازال لينا الخطوة الثانية اللي غتكون فالتيران ديالنا، وغيكون معنا الجمهور يعاونا". وكملت گابيتان المنتخب المغربي: "غنساو هذا الماتش وناخدو غير الزوين اللي فيه ونركزو على تصحيح الاخطأ ما نعاودوهمش ونوجدو للماتش ديالنا اللي كنتمناو تلعبوه بتركيز عالي وأريحية اكثر ونتيقو فراسنا اكثر باش نقدرو نطبقو اللعب ديالنا وناخدو بطاقة التأهل للدور الرابع والاخير من الاقصائيات".
