فاتح ماي فكازا. بركان حاضرة بتونيها عند موخاريق وفلسطين جامعاهم مع نقابة الاموي والريسوني والراضي ما غابوش وضربة اخنوش ما خلاتش العمال يخرجو

شارع الجيش الملكي فكازا خاوي هاد الصباح حدا استئنافية الدار البيضاء. خاوي من الترافيك ولكن كاين بنادم او ناس الاتحاد المغربي للشغل حدا مقر نقابتهم. فحدود لحداش وربع مازال ما جاوش گاع الضيوف.
شعارات مساندة الشعب الفلسطيني مخلطة مع مطالب عمال النقابة الأشهر فالبلاد. فهاد الاحتفال اللي جا يومين بعد توقيع اتفاقية أبريل المتعلقة بالحوار الاجتماعي، كان عدد الحاضرين قليل. يمكن يتزاد مع لطناش ولكن التعبئة كانت اقل. توقيع حكومة اخنوش مع النقابات الاكثر تمثيلا ونامس الاثنين 29 أبريل 2024 والباطرونا ديال لفلاحة والعادية وإعلان زيادات مهمة، خلات عدد من النقابيين يبقاو فديورهم.
اللي مثير، كيف عاينتو "كود"، فتجمع الاتحاد المغربي للشغل هو حضور الراية المغربية كيف بانت فتوني نهضة بركان. اعضاء الفرقة الموسيقية للنقابة اللي كانت تقدم معزوفاتها كلهم لابسين جيلي فيه خارطة المغرب من طنجة للكويرة. "كود" سولات نقابي تماك. رد باللي هاد الشي داروه بعد ما وقع اللي وقع بين نهضة بركان واتحاد العاصمة الجزائري اللي نساحب بسباب توني فيه خارطة المغرب كاملة.
نفس العدد القليل كان حاضر فالنقابة الوطنية للتعليم التابعة للمنظمة الديموقراطية للشغل بشارع محد الخامس. عدد اللي مريح فالقهاوي المجاورة كمثل نسبة لابأس بيها من هادوك اللي كيسمعو خطاب زعماء النقابة.
بدرب عمر وكيف عاينات "كود" كانت فلسطين حاضرة فالكونفدرالية الديمواطية للشغل. سيون اسيدون وفي لمبادؤو هاز راية فلسطين ووراه شعارات منددة ماشي غير بالاحتلال، حتى بالشركات اللي عتابروها شباب السي دي تي". دعوات لمقاطعة عدد من الشركات.
نقابة الأموي اللي مكلف بيها الزاير دابا، جامعة إسلاميين باينين من لباسهم وصحاب أطاك وبقايا اليسار الراديكالي.
فهاد التجمع اللي ما كانش فيه الحضور كبير. بحالو بحال اللي حضرو للاتحاد المغربي للشغل، كان حاضر "المعتقلون السياسيون". ام الصحافي عمر الراضي وعائلة بعض الصحافيين المعتقلين كانو حاضرين. هازين صور الريسوني والراضي وغيرو. كيطالبو بإطلاق سراحهم. على طاقة وعلى اصرار وعلى شخصية قوية عند ام عمر الراضي. من نهار دخل وهي فمعركة ما وقفاتش لإطلاق ابنها. عمر مشدود فقضية غريبة. مكانو خاصو يكون مع صحابو ف"أطاك" اللي كيناضلو ضد وحشية الرأسمالية. دابا كاينة غير ماماه اللي فالشارع. كطالب بعودة الابن المرضي.
فاتح ماي ماشي يوم الاحتفال عند كلشي. ماشي يوم راحة عند كلشي. حدا مقر "السي دي تي" كاين ناس خدامين. كيجمعو السلعة فميكات ويعمرو الكاميوات. كاين حتى صحاب صيكوك والساندويتشات اللي مدورين الحركة.
فكازا العجيبة كلشي كاين. الاحتجاج والبيع والشرا والبركة فالقهاوي والسعاية لكثار بزاف ف"كافي فرانس" وكاين الترام والخطافة والطاكسيات والفراشة. هاد الخليط متعايش فكازا فعيد الشغل