شومبيونزليگ: البايرن والريال خرجو تعادل فماتش كبير دارو مزراوي

خرجو بايرن ميونخ الألماني وريال مدريد الإسباني معادلين فماتش لالي دومي فينال شومبيونزليگ، بنتيجة 2 لجوج اليوم الثلاثاء فلالمان وتأجل التعرف على الفريق المتأهل حتى للروتور السيمانا الجايا.
ريال مدريد ماركاو هما الاولين بهدف ديال البرازيلي فينيسيوس جونيور فالدقيقة 24، وضربو بايرن ميونخ التعادل فالدقيقة 53 ماركاه ليروي ساني، وزادو الهدف الثاني فالدقيقة 57 بواسطة هاري كين من بيلانتي، أما ريال مدريد ضربو التعادل فالدقيقة 83 من بيلانتي وماركاه فينيسيوس جونيور.
الماتش بين بايرن ميونخ وريال مدريد لعب فيه المغربي نصير مزراوي مع الفريق الألماني الماتش كامل، ودخل المغربي الاخر ابراهيم دياز مع ريال مدريد فالشوط الثاني فالدقيقة 76.