دوزيم باش تضحك باقي المغاربة جمعات الريف و ضرباتو افتراضيا بزلزال قوته 7،7

الضحك الباسل هذا بعدما اقدمت دوزيم على فبركة خبر زلزال افتراضي جمعات فيه الريف الناظور و الحسيمة و ضرباتهوم بهزة بقوة 7،7 على سلم ريشتر ( إبادة جماعية و صافي ) و لصقات الخبر لمؤسسة عمومية قائمة بذاتها و ذكرتها بالإسم و هي المركز المغربي الجيوفيزيائي و دوزاتو في كاميرا خفية حامضة بحال إلى هاد دوزيم فوق القوانين كاملة .
هادشي وقع فالوقت اللي باقي الناس فالريف كايعانيو نفسيا من تبعات الهزات المتتالية .
و الغريب أن دوزيم قدرات تصنع الخبر و استغلات فيه بلاطو الأخبار و مقدم الأخبار و أرشيف الأخبار و دوزات صور زلزال الحسيمة 2004 المأسوي في حين أنه ما عمرها دارت هاد المجهود كامل و قدمات أخبار عاجلة على الهزات لي دازت بالريف و كلنا كانعقلو الأعمال لي كان في تغطية الهزات الحقيقية .
الناس فالناظور و الحسيمة طالع ليهوم الزعاف و كيرفضوا صناعة الضحك على جرحهم و مآسيهم و كايطالبو بتدخل الهاكا و وزارة الإتصال لردع هاد دوزيم .
و أكيد أن الأمر غادي فهاد الإتجاه بعدما راسل ناشطون عدد من البرلمانيون بالمنطقة لي بينوا من الكتابات ديالهوم عبر صفحات التواصل الإجتماعي أن القضية ما غاديش دوز عادية .