علاش هاد كمية الحقد الكبيرة على دنيا بطما من طرف بعض الناس فالسوشل ميديا؟

من بدات دنيا بطمة وانا متبعاها ! فاش كانت فعرب آيدل كنا كانتفرجو فيها العائلة كاملة و كانساينوها دوز ! و حتى فاش كايدوز البرايم ! نهار الاثنين كلشي كايصبح كايهضر عليها فالخدمة.
شخصيا ! كاتجيني دنيا بطما من أعظم الاصوات لي دازو عبر التاريخ ! ايه عبر التاريخ ! و كاتجيني كون كانت فوقت ام كلثوم كون ديطرونات ام كلثوم ! ايه ديطرونيها ! علاش شكون قال بلي ام كلثوم هي السوموم ديال الأصوات ؟ و واخا اليوم الاختيارات الفنية ضعيفة و كاتجيني ماستاغلاتش صوتها بالشكل الكافي و لكن كاتبقى مطربة حقيقية و عندها صوت عظيم.
و حيت تبعتها من بانت فعرب ايدل! تبعت على كمية الحقد و الغل لي كان كايتوجه ليها فالسوشل ميديا ! فاش يا الله بانت كانو شي باجات مشهورين حاطين عليها ! كايلوحو تصاورها و آ شمنك يا سبان ! و يا معيور! و يا اهانات ! آه لاواه موسطاشة ! ا لاواه خايبة ! ا لاواه مسلوتة !
و هي كاتزيد تكبر و تزيان و دير لاباس و تغلاض و هوما مقابلينها ” اه عمليات التجميل ! اه صايبات فمها ! اه صايبات نيفها ” و كأنه مامنحقش الانسان يعتني براسو !
الحاقدين على دنيا بطما كاينقاسمو لجوج فئات على اساس الجنس :
البنات الحاقدات فاتيفلوغات ! حاقدين عليها حيت قالك ” خايبة” و دارت داكشي لي ماداروهش هوما ” البوگوصات” ! واخا انا كانشوف بلي بطما ماخايباش و جايبة المعدل على بزاف ديال المغربيات كانشوفهم فالحمامات و عند الكوافور …
الدراري الحاقدين و هوما واحد الفئة ديال الدراري لي كايحقدو على اي بنت البلاد نجحات و تلعقات و دارت لاباس حيت كاتهرب ليهم من تحت السباط لي باغين يحطوها تحتو!
و هادو بجوج لهلا يسلطهم على شي مسلم ! و لا كافر ! حيت هاد جوج ديال الفئات ميكروبات ! فيروسات ! ايبولا و ليه الدوا عليهم.
كاتبقا دنيا باطما انسانة ناجحة ببزاف ديال المقاييس ! و من احسن الاصوات المغربية و العربية و حتى العالمية گاع ! بزاف ديال الناس كايلوموها على الاجوبة ديالها و التعليقات فالسوشل ميديا ! و لكن انا كانعذرها حيت بصح للضغط و الحسد و الحقد لي مسلطين عليها كايمرضو اي واحد.
مؤخرا قالك ضاربات مع سعيد الناصري حيت ضحك عليها فشي سكيتش ديالو و قال بلي كادير بزاف د عمليات التجميل.
هوا من حقها دير لي بغات و تبدل شنو بغات و هي حرة هادي مايحيدهاش الطبيب ! و لكن حتى سعيد الناصري ككوميديان ( واخا ماكايضحكنيش انا بعدا و كايجيني ضحكو باسل و لي گاگ ديالو كلهم موخودين من نكتب قديمة ) و لكن من حقو أنه يجعلها هي او اي واحد آخر مادة للسخرية ! حيت السخرية و الضحك هوما هادو ! راه اعظم الممثلين و المغنيين قلدوهم الكوميديانات.
نعيمة سميح شحال قلداتها حنان الفاضيلي ؟
و باسم فرغلي شحال قلد فهيفاء وهبي و ميريام فارس ؟
خاص غير مايكونش الحقد و التجريح هوما العوامل لي كايحركو بنادم ! اما لي بغا يضحك على شي حاجة راه من حقو يضحك عليها