لي ماعجباتوش المظاهرة لي دارو العيالات مورا الواقعة ديال الطوبيس يكون راجل و ينزل تاهوا للشارع يدير مظاهرة على داكشي لي مقصحو عوض يبقا مخبي مورا الكلافي " هاالفيمينيستات خايبات" " فيمينيستات حاقدات" " ترجل آ الرويجل!

غربية ردود الفعل ديال الأغلبية ديال الرجال المغاربة على للمظاهرة لي خرجو فيها العيالات من بعد ديك الواقعة ديال الطوبيس.
فحال الى ماشي من حق العيالات يخرجو يغوتو على شي حاجة ضاراهم !
نقدر أنا كمرا مانتافقش مع بزاف ديال الفيمينيست و نحس بيهم ماكايمثلونيش " أحسن تمثيل" ! و راه بصح كانشوف فيهم "شي وحدات" مسطيات حمقات حاقدات و صافي، كاين لي كاتلقاها بصح عندها كراهية غير مفهومة للراجل بصفة عامة، و سبق ليا تانا دابزت مع شحال من وحدة من هادوك لي كايسميو راسهم " فيمينيستات"…
و لكن فنفس الوقت ! لاكنتي كاتفرج فواحد الاشهار ديال " اكتيفيا" غادي تسمع بزاف بواحد البكتيريا "البيفيديس اكتي غيگيلاغيس" ! البيفيديس بكتيريا وي !وفاش كاتسمع بكتيريا اول حاجة كاتفكر فيها هي ميكروب وسخ مرض ! و لكن كاينين بكتيريات لي " مفيدة" للجسم! فحال "البيفيديس" لي كايسهل الهضم ! دوك الفيمينيستات " لي أنا ماكانتافقش معاهم" كايبقاو مفيدين ليا و مفيدين للجسم " المغربي" ! و كانبغيهم يخرجو و يغوتو ! حيت محتاجة ليهم يخرجو و يغوتو ليا على قانون الاجهاض لي بسبابو كايموتو آلاف العيالات فالعام و كايتلاحو آلاف الدراري فالطوارو د الزبل و محتاجة يخرجو يغوتو على التحرش لي بسبابو لا دخلتي لأي فوروم و لا بلوگ ديال السائحات الأجنبيات لي دازو من المغرب غاتلقاهم كايهضرو على المغاربة فحال شي حيوانات " ماضحكوش مع المغربي راه كايلصق كي العلگة" " ماتبتاسموش للمغربي راه لا بتاسمتي ليه كايصحابو بغيتي تنعسي معاه" عنداك من المغربي ! حضي من المغربي! ماتخرجيش بوحدك! من الأحسن تسافري مع شي ولد! ، حنا بنات البلاد خلاص ! طبعنا مع هاد الظاهرة واخا غير صحية ولينا مسلكين معاها بزز منا، ولكن محتاجين للفيمينستات على اختلاف مشاربهم و العيالات يخرجو يغوتو على هادشي، على حقوق المرأة و الحريات، حيت باغا انا نعيش فمجتمع كايآمن بهاد الأفكار باغا الحقوق تكون مضمونة للجميع بدون فوارق على أساس الجنس، يقدرو مايوصلوش الميساج كيما أنا بغيتو مثلا يوصل و لكن غي داك الضجيج لي كايديروه كانشوفو مفيد و صحي و غانربح منو و غايربحو منو عيالات اخرين! يمكن مع الوقت الخطاب يتحسن و يجيو فيمينيستات اخرين احسن نتافق معاهم ! يمكن مايجيوش ! يمكن انا نيت نزل نغوت كيما بغيت انا عوض نبقا عوالة على البيفيديس تغوت فبلاصتي ! ولكن و لكن و لكن تافقت معاهم و لا ختالفت معاهم ! كانبغيهم يخرجو و يغوتو و يحتجو لأنه أولا من حقهم يخرجوا، ثانيا اللهم ميات مسيرة من هاد النوع و لا مسيرة وحدة ديال "ولد زروال" و ثالتا حيت فعلا العيالات مقودة عليهم فالمغرب و لا ماخرج حد ! ماغوت حد ! ما هلل حد ! غايبقا الحال على ما هوا عليه.
المشكلة كاتولي كاينة فاش كايبانو شي وحدين كانو ضاربين الطم العام كامل وغي كاتخرج شي مظاهرة ديال العيالات و كايخرجو من الجحور كي الطوبات يااااا سبحان الله! كاتحس بيه باغي يلصق و صافي غي حيت لي خرجو عيالات! غا باغي يهضر و باغي نتاقد و ربي كبير ! " ألاواه الفيمسنيستات حاقدات" " آلاواه كلهم مطلقات" " آ لاواه خايبات " و عاد هوا كايبغي يدير فيها دادا الفهيم و كايبدا يطلق شي نويطات ياااا سلام " ماشي غي العيالات لي كايعانيو من تاهيماجيت" " ماشي غي العيالات لي كايعانيو مع الهايش مايش"
ويتك ويتك على الرويجل
وا سير آ خويا غوت على راسك شكون منعك! دير تانتا مظاهرة ضد التاهيماجيت و التصوفيج و الهايش مايش لي كاتشوفهم مضيرونجينك ! دير مظاهرة تانتا ضد الفقر لي كاتشوفو هوا السباب ديال هادشي كلو للرجال و العيالات! نوض جمع تانتا الوقفة و دير شي حاجة عوض تحل علينا دلقوشك و نتا كاتحك *ليواتك و فاش تبان ليك تصويرة وحدا خارجة فمظاهرة و هازة لافتة فيها " كفتو و ماتغتاصبونيش" تكومونطي ليها ( قبل ماتمسح صباعك من بقايا الخلايا الميتة ديال قلاويك) " خايبة و قاتلك نتحرش بيها" و نتا عارف راسك عايش فبلاد كايغتاصبو فيها الحيوان و الطفل و حتى فوزية بريوگها طحنها ولد ختها ،نوض آ خويا غوت على راسك لا ضاراك شي حاجة ماشي تسناو تاينوضو العيالات يحيحو عاد " لا خاصهم يدويو علينا بجوج " " راه تا الراجل مهضوم فحقو " " لا ماتقوليش كفتو " " لا رقاو شوية فالخطاب ديالكم" ! راك راجل زعما ! دوك ال*لاوي لي ماغاينفعوكش تهبط تغوت على حقوقك لاش صالحين ؟!
البرلمان راك عارفو فين جا
المقر ديال رئاسة الحكومة كاينة لادريسة ديالو فگووگل ماب
رقا نتا نيت آ خويا ! رقا و طلع النيفو و هبط تانتا دير مظاهرة غوت على داكشي لي مقصحك و بين لينا عوض تبقا مخبي مورا الكلافي و كاتكريتيكي آ الرويجل.