واش هادي بلاد وواش ما كيحشمش. واحد بحال لعرايشي غادي ويقتل فشركات القطب العمومي ومازال فبلاصتو. الزايدي طلبات لجنة تقصي الحقائق حرك ليها باطرون “الاولى” كتائبو

هاد السيمانا طالبات سعاد الزايدي عضوة المجموعة النيابية للتقدم والاشتراكية لتكوين لجنة نيابية لتقصي الحقائق باش يعرفو اش واقع فالقطب العمومي للاذاعة والتلفزيون. هادي ماشي اول مرة واحد من التقدم والاشتراكية كيتقدم بطلب بحال هادا. دارتها كجمولة منت ابي فالبرلمان السابق على قناة لعيون وغيرها وما عمر نتائج هاديك اللجنة بانت.
غير الزايدي بنت الصحافي الشهير الراحل احمد الزايدي زادت حتى “دوزيم” لهاد اللجنة. السيدة انطالقات من نتائج تقرير المجلس الأعلى للحسابات. تقرير فضح سوء التدبير وامور كثيرة.
الزايدي تحدثات على امور كلشي عارفها وكلشي ساكت عليها: “ُفساد طاغ وزبونية” و”باك صاحبي" ودهن السير. يعني الرشوة وصافي.
الزايدي صورات العرايشي كديكتاتور حقيقي ما يقدر حد يوقف قدامو. السيد متعني بدعم الملك وكيقولها وفرحان بيها. اش هاد الشوهة. خاصو يمشي فحالو هادي مدة. ياك الدولة براسها قالت ما يبقاش الواحد فمنصبو مدة طويلة. وراه دوز 19 عام. كتبوها ليه احسن.
البرلمانية طالبات باعمال مبدأ “ربط المسؤولية بالمحاسبة”.
ما تقدمه قنوات القطب العمومي مع “دوزيم” كيزكي هدرة سعاد الزايدي. كلشي مقود. اعمال ضعيفة. المحسوبية فالبرمجة. خرجو فنانين قالو هاد الشي وما تبدل والو. اللي تكلم يحبسو عليه روبيني القنوات.
دابا هاد الشركة كتاكل 60 مليار سنويا ونسبة كبيرة كياكلوها الموظفين. عندهم 34 مدير وكل واحد عندو على الاقل 50 الف درهم.
باش خرجات الزايدي بهاد الشي ديال لجنة تقصي الحقائق ناضو ليها كتائب باينة صحاب الامبراطور لعرايشي وبداو يسبوها: اه خوك سعيد موظف شبح. اه اختك مزوجة بمحمد الحضوري اللي كان مدير مركزي. اه انتي ما خاصكش تهدر. اش هاد التخربيق. بالعكس هاد الشي يخلي لكلامها معنى.
وهاد الامبراطور فيصل لعرايشي خاصو يمشي فحالو. راه استمرارو كيبين باللي الدولة ما عندها حتى نية لا فالاصلاح بشكل عام وما مسوقاش للاعلام العمومي وفنفس الوقت رافضة تعطي رخص لقنوات خاصة. يعني باغيين لمغاربة يهربو اكثر لقنوات اجنبية.