ها هما رجعو لكلام الصايل. دوزيم كيوجدو فيها باش تخرج منها الدولة وتاخدها اس ان اي.غادين يزيدو 200 مليون درهم فراس المال

لخبار ديال قرار رفع كابيطال "سورياد دوزيم" ب200 مليون درهم يالله خرج. حسب مصدر "كود" هادا ماشي قرار ديال مجلس اداري تعقد هادي يومين او ثلاثة حقاش ما تعقد حتى مجلس دابا بل قرار تقرر هادي عامين.
حسب مصدر "كود" فان اخر مجلس اداري للقناة كان اواسط دجنبر من السنة الماضية، ولكن اش كيعني هاد القرار؟ مصدر "كود" قال ان القرار هو اعلان اكتتاب. اي كيكولو للمساهمين اللي كاينين فالقناة =الدولة بشي 72 بالمائة والهولدينك الملكي الشركة الوطنية للاستثمار بشي 23 بالمائة والباقي موزع بين شي 5 الشركات خاصة= يمكن ليكم تعلنو شحال باغيين تحطو من هاد 200 مليون درهم.
الدولة للي ما كتعطيش للقناة الثانية "دوزيم" لفلوس هادي مدة واللي اداراتها ديما كتقول حنا خدامين بالاشهار حقاش عندنا نسب مشاهدة كبيرة فالسوق الوطنية٬ موحالش تعطي شي فرنك. ماشي غير موحالش بل فصالحها تبعد من هاد القطاع.
المتوقع واللي كيبان قريب للمنطق هو ان هاد المبلغ تحطو الشركة الوطنية للاستثمار =اللي هي "اونا" اللي كانت عندها الاغلبية فالقناة باش طلقاتها فرابع مارس 1989. طبعا ايلى وقع هاد الشي من هنا لشهرين او ثلاثة مدة الاكتتاب٬ غادية ترجع "دوزيم" قناة خاصة.
الدولة فصالحها ترجع لما كان ينادي به مدير القناة الاسبق نور الدين الصايل فبداية 2000 اي قناة براسمال خاص٬ هاد الفكرة كان كيشجعها الملك محمد السادس واللي تزامنات مع بداية حكمه. احداث 16 ماي 2003 خلات التيار اللي كان باغي "قطب عمومي" بحال فرنسا فيه كاع القنوات العمومية٬ يغلب. انذاك فيصل لعرايشي الرئيس المدير العام لهاد القطب بدعم من وزير الاتصال حينها نبيل بنعبد الله كانو مع الدولة تهيمن على القنوات. باش يبيعو فكرتهم قالو "شفتو وكون الدولة ما عندهاش هاد القناة "دوزيم" كيفاش نديرو تغطية احداث 16 ماي". طبعا تبرير كيبان دابا غبي بزاف ولكن فديك الوقت يمكن كان عندو معنى اخر.
مقابل القطب العمومي كان خاص الدولة تحرر القطاع السمعي البصري وتخرج قنوات خاصة. هاد الشي ما كانش حقاش فالعمق مالين مشاريع القنوات ما كانش همهم التلفزيون بقدر اظهار قوتهم ومواجهة خصومهم. لفضيحة ان كاع اللعابة ديال هاد القنوات كانوا من المحيط الملكي.
دابا داز الوقت وقنوات القطب العمومي دارو بلا ما تكون عندهم شي فائدة ودوزيم دخلوها فهاد القطب العمومي ورجعوها قناة بلا تاثير، كيشوفوها الناس ولكن ما كتاثر فوالو. ظهور المواقع الاخبارية والفايسبوك واليوتوب والويب تي في خلط كلشي. اليوم الفايسبوك يقدر يكون مؤثر اكثر من كاع قنوات القطب العمومي. شفنا احداث هاد السنوات من دانيال كالفان المغتصب اللي اغتصب 11 طفل مغربي وخدا عفو ملكي وشفنا اخيرا مول الحوت فالحسيمة وشفنا حتى مسيرات معروف شكون دارها باش تطحن العدالة والتنمية وما يربحش الانتخابات وكيفاش تقلبات عليهم بالمواقع الاخبارية بالفايسبوك.
انطلاقا من هادا القنوات غادية وتخدم واخا معطلة اليوتوب والفايسبوك مقابل هاد الشي هناك قنوات كتوجد مدير نشر "الاخبار" رشيد نيني قرب يطلق قناتو ويونس بومهدي مول هيت راديو" حتى هو خدام على وحدة وكاينين اخرين. كلهم كيوجدو قنوات اللي كلشي غادي يتخدم من هنا فقط البث من خارج المغرب. بهاد الطريقة الدولة غادية دير تحرير القطاع بطريقتها واللي فات الحدود ديالو يسدو ليه شركات الانتاج ومريضنا ما عندو باس.
فهاد التحولات هناك احتمال كبير ان الدولة تتخلص من الكلفة لكبيرة المادية وحتى السياسية . ما غاديش يبقاو كل مرة يكولو قناة بفلوس الشعب وكيدوز لمسخ ديال هاد المهرجان او داك…..