كذبة المصالحة فالاتحاد. كيفاش صرفق اليازغي لشكر: ها شروطي 3 للمصالحة

كيبان ان هادشي ديال المصالحة داخل الاتحاد الاشتراكي ، بدا كيسخن فيه الطرح و بدا كيعرف فصول جديدة , ادريس لشكر الكاتب الاول للحزب٬ اللي كان معول على الرغبة ديال الاتحاديين في العودة الى حزبهم ، توجهت ليه اول تصرفيقة ، ملي مشا يتصالح مع الاستاذ ديالو اليازغي ، اللي خرج فيه عينيه مزيان و حط ليه مجموعة من الشروط اللي ممكن تجعلو يقبل بالمصالحة و يعاون في رجوع المناضلين .
اليازغي اللي اكدت مصادر اتحادية ل”كود”، انه استقبل لشكر والحبيب المالكي في اجتماع سابق للقاء ديالو مع المكتب السياسي ديال الاتحاد في اطار الزيارات للقيادات التاريخية للحزب، وضع ثلاثة ديال الشروط لادريس لشكر باش يقبل يرجع للحزب ويساعد في عملية المصالحة.
نفس المصادر اكدت ل”كود” ان اليازغي اشترط على لشكر والمالكي ، انهم يقدموا نقد ذاتي على كل ما قامو بيه في حق الحزب وحقو هو شخصيا ، ثانيا انه يقبلو يتفاوضو بشكل شامل على مستقبل الحزب وثالثا ان رئاسة لجنة حكماء الحزب اللي غادي تقوم بالاشراف على المصالحة يترأسها اليازغي شخصيا.
هادشي بطبيعة الحال لشكر ناكرو على اعضاء المكتب السياسي ، لكن كلشي حس ببرودة اللقاء مع اليازغي اثناء زيارتهم ليه ، اللي ما تعداش اكثر من 30 دقيقية ، واللي ما نطقش خلالو اليازغي باكثر من جملتين ديال المجاملة، مع بعض اعضاء المكتب السياسي٬ رحب فيها بالوفد
مصدر قيادي داخل الاتحاد الاشتراكي اكد ل”كود” ، ان لشكر حاصل في هاد المقترحات ديال اليازغي وما قادرش يتعامل معاها، لانه بان اليازغي ما بغاش يوقع شيك على بياض للشكر، خاصة وانه كيعرفو مزيان وكيعرف القدرة ديالو الكبيرة على المناورة ، والانقلاب على الاتفاقات ديالو .