الرابور يونس طالب المعروف "بالموتشو" أو "الموبيديك" هو الوحيد لي هادي مدة طويلة وعلى خلاف بزاف ديال الروابا للي "باعو لماتش" بكري, بقا محافظ على ديك الصورة "لمزيانة" ديالو بين الأتباع ولعديان",كونو من نهار بدا وهو كيبرابي فداك الإطار ديال" أنتي سيستيم" و"أنتي تامرايقيت",وعلى أنه على حسب ما كيقول عندو مبادئ غيبقى متشتبت بهم إلى أخر رمق,عكس كاع الروابا لاخرين للي كانت متسلطة عليهم الاضواء بحال لبيك ومسلم وديزي دروز وللي كان سي موبيديك كيظل "يكلاشي" فيهم من خلال كاع لي تراك ديالو, ومعظم دوك ليزانتيرفيو للي تدارو معه …زعما على ود أنهم نهار بانت ليهم التغميسة مع مالين الوقت ناضو غمسو وقلبو ستة تسعود .. هذا في حين أنه هو كيحرص في أي ظهور ليه باش يسوق على راسو أنه "ماشي بحالهم" وماعمرو غادي يعطي الطوع ويكون مرايقي. بدافع الظروف او غيرهم ….وبناء على ذلك كاين بزاف ديال ليفانز ديالو كانو كيتسناوه زعما يفركعها بشي تراك "كاين" بمناسبة هاد المهزلة ديال الحملات الانتخابية للي ولينا كنشوفو , فإذا بخونا رمان كيبان في مشهد مثير للشفقة كيركز مع شي دريريات كينادي قاليك بالتغيير فواحد لاشين فليوتيوب للي من خلال المحتوى الاول ديالهم جدة هيا لاخرا للي مكتقشبل تا وزة فهاد الحزاق, غادي تقوليك ان داكشي ديال لبام …. والصادم في الامر بالنسبة لي كيعرفو موبيديك مزيان هو كيفاش أنه كرابور ضد هاد التنقاز ,وهاد التبلحيس .. وديما كيردد زعما يا حسرة انه كل "يلغي بلغاه وماشي خونا هو "ومصدع لينا مؤخراتنا بأنه خايف على الراب من أنه يتمييع, ويمشي فداك المنحى لي مشاو به لفناير…. واش كاين ..ينوض يدير فراسو هاد لحالة.. و من واحد الناحية خرا على الاقل لبيك ولا الاخرون لي دارو جات معهم بحكم را كيشفع ليهم أنهم ماعمرهم أدعاو بلا هما ضد شي واحد فدومينهم قرر شي نهار بحالو بحال لخوت يغمس فشي مريقة مع لمخزن… ودابا من هادشي كامل..غا _ بيني وبينك_ اودا سي موبيديك بغيناك غي تقولينا "بصفتي أحد من المعجبين ديالك" للي مع كامل الأسف خيبت أمالهم..أش أوا وقع ليك؟. هل هددوك ؟ هل أغروك, هل كان للمخزن دور في ذلك ؟…ألم تقل لنا يا سي موبيديك يوما «بيع فكلشي إلا راسك وماتقوليش عندي ظروف » …..هل يحق لنا دابا حنا بدورنا نقولو ليك ومن لحيتك نلقمو ليك… وسييير مسح صباعك من لمروق عاد جي يعطينا الدروس؟
