هاد السواعدة عندهم 700 وجه، كل واحد ينسيك في لاخر. غير العام لي فات قالو الصحرا ماشي مغربية، جاو هاد العام وقلبو الفيستة وغادي يديرو حفلة قدها قد السخط احتفالا بالذكرى 44 ديال المسيرة الخضراء. السعودية اختارت قناتها الجديدة Mbc5 باش تبين موقف عكس لي عبرات عليه هادي مدة وتسبب في توتر العلاقات بينها وبين المغرب. وبدات القناة البارح في عرض لقطات من الحفل لي وصفاتو بالأسطوري وغادي يكونو فيه نجوم ومشاهير مغاربة. قضية القناة مازال ممعروفاش ومن ديما في “كود” كنقولو أن بن سلمان ولي خدامين معاه داخلين باش ينشرو التخلف عن طريق الفن، وباغيين يحسنو صورتو بعد الشوهة ديال مقتل الصحافي جمال خاشقجي، بفلوس البترول. وكان المغرب استدعى في فبراير لي فات السفير ديالو في السعودية للتشاور، وكانوا وقعو خلافات كبيرة بين البلدين. وأكد السفير مصطفى المنصوري استدعاءه من الرياض. وقال مسؤول حكومي لرويترز ان المنصوري موجود في المغرب دون أن يحدد المسؤول علاش ولا كيفاش.