سكوب. شكون كذب عليك آمحمد السادس وباع ليك باللي قنصليتنا فاورلي مثالية وزرتيها هادي عام اي فالوقت اللي تعدات فيه القنصلة العلوي على الخدامة= تفاصيل حصرية تنشرها "كود" على هاد مولات الفعلة اللي ريحتها عطات بزاف وحامينها ناس صحاح = صور وفيديوات

شكون كذب على الملك محمد الملك السادس العام اللي فات وقال ليه باش تبيع هاديك القضية ديال العمل القنصلي نديرو زيارة لقنصلية اورلي بباريس. هاد الشي اللي وقع ونهار 23 فبراير 2016 دار الملك زيارة وناض الوزير المتورط رقم واحد فهاد لفضيحة صلاح الدين مزوار وزير الخارجية ودار خطاب. الفضيحة لكبيرة انه فهاد الوقت على حساب تصريح ل"كود" لمصدر فالخارجية قنصلة المغرب في اورلي مليكة العلوي دارت هاديك الفضيحة مع الخادمة اللي جابتها من المغرب وقولباتها حتى بغات تشعل العافية فراسها وجا البوليس. فيديو هاد الفضيحة يالله خرج
كيفاش هاد القضية ديال قنصلية مثالية بقنصلة كدير هاد الممارسات لمقودة بزاف. ولكن واش هاد الشي كان فراس المسؤولين؟ حسب مصدر "كود" هاد الشي كان فراسهم وفراسهم امور اخرى. مصدر "كود" قال باللي تعيين هاد السيدة غريب وفحد ذاتو خاصو فتح تحقيق "على كيفاش وحدة كانت شاف دو سيرفيس =مسؤولة قسم" فالمديرية القانونية ما معروفاش حتى يعطوها مرة وحدة منصب قنصل". يعني ان شي حد مورط فهاد البيعة والشرية ديال التعيين.
مصدر "كود" قال باللي هاد السيدة ما كانت معروفة بزاف بالخارجية وحتى باش مشات لالمانيا كان تعاملها خايب يشرح مصدر "كود".
هاد العلوي هي اللي قدمات للملك مرافق القنصلية يوم 23 فبراير 2016 وكلشي كانو عارفين شكون هي.
كيفاش قنصلية مثالية كتعامل مع مغربيات =الخادمة= بهاد الحقارة والوضاعة. سفير المغرب في باريس مسؤول ووزير الخارجية الفعفاع مسؤول وبجوج خاصهم يخلصو علي هاد الفضيحة حقاش كذبو على الملك ماشي غير كذبو عليه بل ضحكو عليه وعلى لمغاربة كلهم. حتى ناس القنصلية اي اللي خدامين فيها كانوا كتبو للخارجية كيتشكاو من هاد السيدة تقول مصادر "كود"٬ وكالو ليهم "عاونونا غير دوز زيارة الملك ونحلو ليكم مشاكلكم" كاين اللي عطاهم وعود باش تحيد كاع. كيفاش عارفينها دايرة هاد الزبايل وسكتو وكذبو وجابو رئيس الدولة