كيفاش قنوات بنسلمان اللي ضد مغربية الصحراء. بنعلي مدير “دوزيم” السابق جابوه مستشار ودورو بيهم ممثلين يسوقو حقارة هاد الدولة ويلمعو صورتها

دابا مصدعينها باشهارات فاللوحات الاشهارية فكازا وغيرها على قرب اطلاق “Mbc 5” اللي غادية تكون موجهة للدول المغاربية. الاسم اللي جايبونو فيه احتقار لشعوب هاد الدول. “المغرب العربي”. هادوك المتخلفين ديال السعودية باغيين يرجعو الدول المغاربية صحة “عربية” ويقتلو المكون الامازيغي اللي كاين فدستور هاد الدول.
من غير هاد الحقارة٬ راه هاد القنوات باغية تخدم صورة محمد بن سلمان ولي عهد السعودية اللي كاع العالم اتاهمو بتقطيع جثة الصحافي السعودي جمال خاشقجي فقنصلية السعودية باسطمبول.
السعودية فهاد المشروع مطيحة بزاف بالمغاربيين جايبين ليهم طبال ديال الاعلام المصري اسمو محمد عبد المتعال سالم عاشور خدم فهادوك القنوات اللي كتمجد دكتاتور مصر عبد الفتاح السيسي وعطاوه رئاسة هاد “ام بي سي 5”. هاد بنادم جاب وفق مصدر “كود” مصطفى بنعلي اللي كان مدير عام ل”دوزيم” لسنوات باش يولي مستشار ليه. اييه حتاقروه السواعدة.
الخطورة فهاد المشروع اللي باغي ينشر ثقافة الجهل اللي عند الوهابيين هو انو عندو مواقف سياسية. ام بي سي” راها فنفس المجموعة مع قناة “العربية” اللي يالله ضربات المغرب فالصحرا. دافعات على الانفصال. دابا هادو اللي خدامين معاهم عارفين هاد الشي وفرحانين بالتعاون مع مالين الفكر الوهابي.
شركات الانتاج كتجري ورا هاد القناة. ممثلين هانوهم بثمن رخيص وفرحانين يخدمو معاهم. الذل وصافي. الذل باش يتنشر الجهل