واش المغرب بصاح باغي يحتاضن كأس العالم؟ ياكما حتى هو غادي يطلب التصويت باش يصوت على مريكان فينك ابوريطة ونوض رد على السعودية وفين الدولة وفين التعبئة =شوفو الفيديو

ما باين المغرب باغي ينظم كأس العالم. كتحس بالمسؤولين ديال الدولة بحال ايلى ما كانوش مصدقين غاديين نجحو فالكتابي وتأهلو للمرحلة الاخيرة اللي غادي يكون فيها التصويت نهار الاربعا الجاية 13 يونيو بموسكو فمؤتمر الفيفا ويختارو بين الملف الثلاثي امريكا وكندا والمكسيك وبين المغرب لاحتضان مونديال 2026. باين باللي من غير مولاي حفيظ العلمي رئيس اللجنة وفوزي لقجع رئيس الجامعة وبعض من اللي كانو مصدقين باللي غاديين نجتارو المرحلة الاولى.
علاش هاد الشي؟ حقاش هاد المرحلة راها مرحلة سياسية ديبلوماسية ماشي رياضية. ها الملف الامريكي موظف دابا كاع السلك الديبلوماسي ديالو. سفارات بلادو فالعالم خدامة على هاد الملف. الرئيس الامريكي دونالد ترامب خدام فيه مزيان مزيان. الحلفاء ديالو او اللي كيحميهم بحال المملكة العربية السعودية خدامة معاه وكتجمع ليه اصوات فاسيا. ديهم للحج تعرض عليهم دير كلشي المهم يبينو لترامب انهم خدامين.
هنا عندنا فالمغرب حتى حد ما خدام. حتى حد ما محرك. اليوم جاي عندنا رئيس نيجيريا بوخاري. خاصو يعلن على دعمو للملف المغربي. هاد الشي كيكون فمناسبات بحال هادي. نيجيريا كيقولو غادية تدعم امريكا. فرصة يعلنها الرئيس او رئيس الجامعة باش ما دخلتش الفيفا ويقولو اه تدخل السياسة فالرياضة.
المشكلة فين كاينة. كاينة فالخارجية. المغرب شارك فقمة الدول الاسلامية فجدة وخرجو بقرار ديال دعم المغرب فالمونديال. تنظم فالسعودية وخرج هاداك تركي ديالهم كيقول غاديين ندعمو امريكا. هنا علاش ما يكونش موقف من قمة الدول الاسلامية وهادي خدمة الديبلوماسية ديالنا. علاش ما يكونش موقف رسمي من الخارجية المغربية. اتصال مثلا او لقاء او شي حاجة. كيفاش السعودية ترسل ليها جنود وطائرات وكيقولو علينا اشقاء ومشاو عند ميريكان. اش هاد الانبطاح عندنا. علاش قابلين الذل. علاش قابلين نزلو السروال لحقراء بحال هادوك.
مثلا دولة عمان اللي ما عندناش معاها شي علاقات مزيانة طلعو رجالة وقالو عندهم تهديد ولكن غاديين يدعمونا فالمونديال.
خاص سفراءنا يخدمو بزاف بزاف. خاص الوزراء يتحركو بزاف بزاف خاص بوريطة وزير الخارجية ما ينعسش.
هادي ايام بثت قناة “ارتي الالمانية الفرنسية” فيلم وثائقي على المونديال ديال روسيا 2018 وصراع موسكو ولندن عليه. راه ما كايناش الرياضة فهاد الشي ديال تربح مونديال. كلشي سياسة. فالفيلم بينو حرب الجواسيس بين البلدين. بحال داك الشي ديال الحرب الباردة. دايور هادا هو عنوان الفيلم.
هنا نجحنا فالكتابي ما فرحناش واخا جينا من بعيد وبزاف كان كيقول ما دايزينش. ودابا كلشي مربع. راه مهمة العلمي ولقجع تقريبا سالات. ايلى بقينا بحال هاكا غير نطلبو الفيفا الحق نصوتو وحتى حنا نصوتو علي الملف الامريكي وصافي