نايضة فالحسنية.. اللعابة نزلوا على لاربيط بعد الهزيمة أمام الوداد والسكتيوي مرشح يبلاصي فاخر

نايضة فحسنية أكادير بعد الخسارة أمام الوداد البيضاوي البارح الخميس بملعب مركب محمد الخامس فالدار البيضاء، برسم الدورة 13 من منافسات البطولة الاحترافية.
اللعابة ما تقبلوش الهزيمة وحملوا المسؤولية للحكم ياسين بوسليم، بعدما أعطى بيلانتي للوداد فالشوط الأول رغم أن بديع أووك طاح خارج الكاري.
اللعابة احتجوا بزاف وأكدوا فتصريحات صحافية هاد البيلانتي حشومة يتعطى، والشيء نفسه بالنسبة إلى الطاقم التقني والاداري، اللي عبروا عن غضبهم من قرار الحكم.
الجمهور مازال مصعد ضد المدرب فاخر وكيطالب برحيله عن الحسنية، وما شي بعيد ينظم وقفة احتجاجية في وسط الاسبوع للضغط أكثر على المكتب المسير.
مصادر “كود” أكدت بلي الحبيب سيدينو، رئيس حسنية أكادير بدا كيتحرك باش يلقى بديل فاخر.
ومن المنتظر أن يتوصل إلى اتفاق مع المدرب السابق الحسنية عبد الهادي السكتيوي، لأنه الوحيد اللي يمكن ليه إطفاء غضب الجمهور السوسي فهاد الظرفية.
السكتيوي هو اللي وضع الدعامات الأساسية لفريق الحسنية وهو اللي عارف الخبايا الداخلية لهذا النادي، فضلا عن علاقته الجيدة بالجمهور.
لكن المشكل فهادشي كامل أن فاخر ما بغاش يمشي بأخف الأضرار، وطالب ب330 مليون سنتيم مقابل فسخ عقده.