بنعرفة كلشي عندو مقلوب وديما داير الضحك فراسو.. رجع فلسطين هي الفيليبين

وضع رئيس الحكومة والأمين العام لحزب العدالة والتنمية سعد الدين العثماني، (وضع) راسو فموقف بايخ، من بعد ما نشر تغريدة فالصفحة ديالو الرسمية على موقع التواصل الاجتماعي "تويتر"، كيقول فيها باللي القدس عاصمة الفيلبين.
وقال العثماني فالتغريدة: “لا بديل عن إقامة الدولة الفيليبينية المستقلة وكاملة السيادة وعاصمتها القدس الشريف”، وأرفقها بصور من المؤتمر الجهوي ل”بي جي دي” بجهة فاس مكناس.
العثماني واقيلا كان مرفوع منين كان كيكتب، وزلقو ليه الصبعان قبل اللسان، أو ممكن كان خدام بالمصحح الآلي اللي حوليه “الفلسطينية” إلى “الفيليبينية” بلا ما يرد البال، هذشي قبل ما يموديفيي التغريدة.
تصحيح العثماني للتغريدة جا معطل شوية، حيت بداو رواد موقع “تويتر” كيضحكو عليه فالتعليقات، وتجاوزات فضيحتو الحدود “التويترية” من بعد ما انتشر السكرين ف”فيسبوك”.
وقال واحد من نشطاء العالم الافتراضي: “إيوا كتامية زينة هذي ضربتي يا زدي يا العثماني”، وقال واحد آخر: “كون غير سكتي حسن”.
وجات تغريدة العثماني هذي من بعد ما علنات وزارة الخارجية على إشادتها بالجهود الأمريكية للي كيقوم بيها دونالد ترامب ف”خطة السلام فالشرق الأوسط” المسمى إعلاميا ب”صفقة القرن”، واللي كتعزز خضوع القدس للسيادة الإسرائيلية.